Российысе марий самырыктукым слет

Самырык пагыт мемнан,

Самырык ме улына!

Ме кугешнен ойлена,

Ме марий улына!

Финн-угор тӱнян культур рӱдыверыштыже Российын тӱрлӧ кундемже гыч ӱдыр ден рвезе-влак чумыргеныт. Тидлан амалже моткоч кугу – 8-14 июльышто Морко районысо Унчо селаште латикымше Марий самырык тукым слёт эртен. Слетым эртарымаш поро йӱлаш савырнен. Марий Эл Республике культура, печать да калык дене пашам намийыме шотышто министерстве, Марий Эл Республике образований да науко министерстве, Марий Эл Республике самырык политике, спорт да туризм шотышто министерстве, «Всемарийский Совет – Мер Каҥаш» общественный толкын, Марий Эл Республикын «Общество межкультурных связей «ВийАр» региональ общественный организаций шуко вийым пыштен. Тыште 18-35 марте ийготан самырык еҥ-влак участвоватленыт.

Слетыш республикынан чыла гаяк районжо, тыгак марий-влакын тӱшкан илыме Башкортостан, Удмуртий, Татарстан Республикла, Свердловск, Пермь кундемла, Санкт-Петербург, Нижневартовск олала гыч 80 утла ӱдыр-рвезе-влакым чумырен. Арня жапыште ӱдыр ден рвезе-влаклан кумда да оҥай программым ямдылыме ыле. Ятыр кундем гыч лектор-влак шинчымашым пуаш толыныт.

Мемнан Калтаса район гыч слетыш ныл еҥ миен: тиде Калмаш ял гыч Яшкина Татьяна, Яшкин Артур да Келтей ялысе школ гыч туныктышо-влак Линючева Дарья ден Ислаева Людмила миеныт.

«Мый тиде слетыш икымше гана миенам. Тудо мыланем моткоч чот келшыш. Тудын тыге моткоч оҥайын эрта манын шоненат омыл ыле. Кажне лужа слёт илышлан чоным пуаш тыршен. Эрден эрак мемнам помыжалтарен, весела зарядкым эртареныт. Слётыш погынышо участник-влак дене яра жапыште тӱрлӧ модмаш-влакым эртареныт. Кечым веселанрак, оҥайрак да пайдалынрак эртараш полшеныт. Нуно кажне кечын эртыше тӱрлӧ мероприятий-влакым эскерен шогеныт. Тыршыме пашашт чылалан келшен. Мастарлыкышт дене вий-куатым нӧлтеныт. Марий Элын артистше-влак «Ачийжат-авийжат» спектакльым ончыктеныт. Тиде спектакль чылалан пеш келшен. Пеш чапле, моткоч сай лийын. Тиде слет мыланем моткоч пайдале лийын. Мый шке йылмемым эшеат чотрак йӧраташ да пагалаш, марий калыкын культурыжым аклаш тӱҥальым. Мый марий улам – мый пиалан улам! Тиде пеш кугу куан! Мый тидын дене кугешнем!».

Мый ӱшанем, шушаш слетым ӱдыр-рвезе-влак чытыдымын вучаш тӱҥалыт. Тенийсе Россий кӱкшытан марий самырыктукым слет у шӱдыр-влакым чӱктыш!

Кунам марий йылме дене кутыраш, шонаш да илышыште шочмо йылмым кучылташ кумыл лектеш? Кунам ача-ава изи йоча дене ешыштыже марла мутланат, кунам самырык рвезе марий ӱдырым йӧратен да ӱдырлан келшынеже, марла ойла, кунам паша сайын шукталтын да Юмылан тау манаш марла ойлаш кумыл лектеш. А тыйын кунам марла кутыраш кумылет лектеш?

Т. Яшкина.