«Салют» йоча тазартыме лагерь кумло ияш юбилейжым палемден

Эртыше кугарнян, 19 июльышто, «Салют» тазартыме лагерьыште пайрем шӱлыш шижылтын. Воспитатель ден вожатый-влак коллектив ты лагерьым ыштымылан кумло ий темме юбилейым палемденыт. Тыгак кызыт кокымшо сменыште каныше йоча-влакат пайрем мероприятийыш ушненыт. А могай мероприятий почетан уна-влак деч посна? Район вуйлатыше, лагерьын ончычсо директоржо-влак да лагерььын коллективше дене пашам ыштыше организаций ден службо-влакын пашаеҥышт ӱжылтыныт.

Пайрем торжественный линейке гыч тӱҥале, тыште сменын чыла вич отрядше вашлиялтын. Икшыве-влак пырля келшен шке речевкыштым ойлышт. А унамыт пуйто угыч йоча годсо жапышт логальыч, эртыше пионер жапым шарналтышт. Да шарнымашышт чыныш миен лекте: унамытлан пайрем шӱлышыштӧ ал тӱсан пионер галстукым пидыч. «Келшымаш» лӱман кудымшо отрядым ыштышт.

– Таче ме чапле пайремым палемдена», – ойла район администраций вуйлатыше Ю.М. Садыров. – Надеждин ялыште кумло ий ончыч «Салют» йоча лагерьым ыштыме да тыште кеҥежым тазартыме сезонышто ятыр икшыве канаш тӱҥалын. Йыр улшо пӱртӱсат моткоч сӧрал. Чодыра, кӱкшата вер-влак, Танып эҥер, яндар юж – чыла тиде икшыве-влаклан тазалыкыштлан кугу пайдам пуа, нуно кушкыт, шуаралтыт. А ты пашам воспитатель ден вожатый-влак организоватлаш полшат. Лагерьым ыштыме деч вара тыште 10 тӱжем утла икшыве канен. Тиде мемнан район гыч веле огыл, тыгак республикынан пошкудо районлаж гычат толыныт. Лагерь ий гыч ийын уэмдалтеш, материальный базыже пеҥгыдемеш. Лишыл жапыште тыште илыме эше ик корпусым ышташ шонат. Тидыже лагерьлан эшета шукырак икшывым приниматлаш йӧным пуа.

Линейке деч вара отряд-влак, тидын годым у «Келшымаш» отряд лагерьын территорийже дене пайдале квестыш каеныт. Станцийлаште тушто-влакым туштеныт, руш калык йомакым шарналташ логалын, шӱкшакым сортироватленыт… Станций гыч станцийыш отряд-влак колонно дене, кидым кандыра дене кылден, то поче-поче ошкылыныт да тӱрлӧ йоча муро-влакым йоҥгалтареныт. Весела, оҥай да пайдале лийын. Финишыш толын шуымеке, унамыт клумбо воктене пеледышым – пионым шынденыт.

Пайрем умбакыже клубышто шуйнен. Икшыве-влак чапле концертым ончыктеныт. Кажне отряд шке номерже дене выступатлен. Номер-влак коклаште мут пачетан уна-влаклан пуалтын. Эн ончыч шке шарнымашыже нерген Тавердян Мария Дмитриевна пайлалте. Лагерьын икымше вуйлатышыже пелашыже Сурик Константинович лийын, а тудо – алмаштышыже. Пелашыжын ош тӱня дене чеверласымыж деч вара лагерьым вуйлаташ тӱҥалын. Тыште 12 ий тыршен.

– Кунам ме ты верыш толна, тыште улыжат вагончик-влак веле шогеныт, – шарналтен ойла Мария Дмитриевна. – Нимо лийын огыл. Тыште мыйын тыршыме жапем – чоҥымаш, территорийым тӱзатымаш лийын. Район вуйлатышылан, организаций-влаклан тау, нуно полшеныт. Поснак Максимова Зоя Валеевналан таум каласыме шуэш. Тунам тудо район администраций вуйлатышын социальный йодыш шотышто полышкалышыже лийын тыршен. Тудо лагерьыште йӱдшӧ-кечыже пашам ыштен манын каласем гын, йоҥылыш ом лий очыни. Мемнан тудын дене шокшо асфальым кольмо дене шалатыме жапнат лийын. Орол, мый, Зоя Валеевна да Камазын водительже, пытартышыже асфальтым конден. А мом ышташ, асфальым кодет гын, катен шинчеш. Шуко шонкалыде кок ӱдырамаш кидышкышт кольмым налыныт…

2005 гыч 2010 ийлаште «Салют» лагерьыште директор лийын пашам ыштыше Р.С. Асадуллина, З.В. Максимова, Р.С. Саматов, ту ийлаште ялозанлык пашаеҥ-влак профушемым вуйлатен, Е.И. Ильчигулов, ту ийлаште КПСС райкомын икымше секретарьже, кызыт ветеранмыт каҥашым вуйлата, шке шарнымашышт нерген ойленыт.

Конешне, уна-влак яра кид дене толын огытыл, лагерьлан юбилейже дене пӧлек-влакым кучыктеныт. Лагерьын кызытсе вуйлатышыже Наталья Александровна Корнева унамытлан тау мут-влакым ойлен да «Салют» лагерьын кызытсе коллективше поро йӱлам умбакыжат аралаш да вияҥдаш тӱҥалеш манын каласен.