«Калтаса ӱжара» газетлан сералтше-влак коклаште лӱмын ыштыме призым Калтаса села гыч Опалаевмыт еш модын налын

Ты кечылаште ме 2019 ийын кокымшо пелыжлан сералтше квитанций-влак коклаште, а нуныштым редакцийыш кондымо лийын, тӱҥ приз-влакым модын нална. Марий йылме дене савыкталтше «Калтаса ӱжара» газетлан сералтше-влак коклаште эше ешартыш призым – мультиваркым – модмо ыле. Тиде газетлан сералтса манын ыштыме. Нигӧлан секрет огыл, газетын тиражше шагалемеш. Тидыже калык периодика изданий-влаклан сералтше-влак шагалем толыт. Сандене марий йылме дене лекше газетлан посна вниманийым ойырышна.

Призым модын налмаште Калтаса села гыч Опалаева Евдокия Опалаевналан пиал шыргыжалын. Тудо шкеже редакцийыш пӧлеклан толын кертын огыл. Тидлан амалжат уло, Евдокия Опалаевналан 79 ий. Призым тудын эргыже Михаил Николаевич налаш толын.

– «Калтаса ӱжара» газетлан авам сералтеш, тудо шке шочмо йылмыж дене лудаш йӧрата, – ойла тудо. – Мыят йӱдвел гыч вахте гыч толмем годым газетым кидышкем налам, оҥай увер ден материал-влакым пытартыш лаштык марте лудам. Ончыч кок Калтаса кыдалаш школыштат марий йылмым туныктыш. Икымше школышто мемнам шочмо йылме дене Пряхина Софья Ильчибаевна туныкта ыле. Тудлан кӧра мый марий йылме дене лудынат, возенат моштем.