Калтаса районыш тазалык автопоезд толеш

Ушештарена, тений шошым БР вуйлатышын пашажым шуктен толшо Радий Хабировын темлымыж почеш республикыште «Таза республике – таза регион» акций тӱҥалын. Районлашке вер гыч верыш кондыштарыме ФАП, флюорографий, маммографий, республике клинический эмлымверын диагностика рӱдерже ден кардиорӱдерже коштыт.

Калык уста специалист-влак деч консультацийым, тичмаш текшырымашым эртен да икымше медицине полышым налын кертыт.

18 гыч 30 август марте автопоезд Калтаса районым обслуживатлаш тӱҥалеш. Тидын нерген погынымаште Калтасасе рӱдӧ эмлымверын тӱҥ врачын алмаштышыже Р.Я. Шарифьянов каласен.

18-22 август – Кугу Качак ял, СДК зданий воктене;

23-24 август – Павасола ял, школ воктене;

25-28 август – Келтей ял, ФАП воктене;

29-30 август – Амчемучаш ял, школ воктене.

Кузе палемдыме ыле, нуно лишыл яллаште илыше калыкым обслуживатлаш тӱҥалеш.

Мутлан, Кугу Качакысе рӱдер Качкинтурай, Кӧгерчен, Изи Качак, Кургак, Нарат да моло ялла гыч калыкым текшыраш тӱҥалеш.

Мучаште район администраций вуйлатыше Ю.М. Садыров каласен: – Кугу черет ынже лий манын, ончылгоч раш графикым ышташ кӱлеш, кажне тыланыше еҥ текшырымашым эртен кертшаш.