Район газетлан сералтын да бензопилам модын налын

Мемнан газетнан тӱҥ призшым Келтей ял гыч Шамсутдинов Валентин модын налын

2019 ийын кокымшо пелыжлан подписке эртыме жапыште ме кажне арнян приз-влакым модын улына. Тудын мучашке лишеммыж деч вара тӱҥ приз-влакым – бензопила ден мультиваркым модынна. Пытартышыже лач «Калтаса ӱжара» газетлан сералтше-влак коклаште гына модылтын. Тиде гана пиал Келтей ялыште илыше пенсионер Валентин Тимофеевич Шамсутдиновлан шыргыжылан.

Район газетым Валентин Тимофеевич ятыр ий налын шога. – Эше мыйын ачам район газетым налын, мый изинекак тудым лудынам, кызытат уло кумылын лудам, – каласкала тудо. – Мый район газетым, «Комсомольская правдам» налам. Почтальон газетым кондымеке, эн ончыч «Калтаса ӱжарам» лудам, вара рӱдӧ прессым. Район уверым эн ончыч пален налме шуэш.

Валентин Тимофеевич ӱмыржӧ мучко нефть отрасльыште тыршен. Ятыр ий Арлан нефтепроводный управленийысе аварийный бригадыште линейный трубопроводчик лийын ыштен. Сулен налме канышыш лекмыж деч ончыч предприятийын котельныйыштыже слесарь лийын тыршен.

Кумшо ий сулен налме канышыште улеш.

– Газет деч приз шочмо кечемлан пеш сай пӧлек лие, – ойла Валентин Тимофеевич. Призым 19 июльышто модыныт, а 20 июльышто мыланем 63 ий темын.

Ме Валентин Тимофеевичым саламлена да тудлан чыла сайым гына тыланен кодына.