Нефтекамск олаште нацпроект-влакым илышыш шыҥдарыме шотышто каҥашеныт

Кодшо арнян Нефтекамск олаште нацпроект-влакым илышыш шыҥдарыме шотышто зональный каҥашымаш эртен. Тудын пашаже нерген мыланна «Икоян Россий» партийын верысе пӧлкажын исполнительный секретарьже Зоя Валеевна Максимова каласкалыш.

– Погынымаш 2 августышто, Нефтекамск олаште эртыш, тушто Нефтекамск ден Агидель ола-влак, Калтаса, Краснокам да Янаул районласе врач, туныктышо, школ директор, «Еш» рӱдерын специалистше, ялсовет вуйлатыше, тӱҥалтыш пӧлкан секретарьже-влак, партийын да мер илышын чолга еҥже-влак участвоватленыт.

Погынышо-влак ончылно Башкортостан Республикысе Кугыжаныш Погын – Курултайын вуйлатышыже Константин Борисович Толкачев участвоватлен. Тудо нацпроект-влакым илышыш шыҥдарыме нерген тичмашын каласкален. Кугу тӱткышым «Образований», «Демографий», «Жилье и городская среда» нацпроект-влаклан ойырымо лиеш.

Нацпроект-влакым илышыш шыҥдарыме годым могай полыш ончыкталтеш, мыняр окса ойыралтеш, чыла тидын нерген республикысе министерстве-влакын пашаеҥышт каласкаленыт. Тиде – Башкортостан Республикысе образований министрын икымше алмаштышыже Ильдар Мавлетбердин, Башкортостан Республикысе еш, паша да соцзащите министрын алмаштышыже Лена Каримова, Башкортостан Республикысе финанс шотышто министрын алмаштышыже Азамат Абдюков, Башкортостан Республикысе предпринимательство да туризм шотышто кугыжаныш комитет вуйлатышын алмаштышыже Азамат Галин, Башкортостан Республикысе илыме да коммуналь озанлык министрын советникше Николай Ельников да республикысе медпрофилактике рӱдер пӧлкан вуйлатышыже Альфия Шарипова.

Нефтекамск ола округын вуйлатышыже Ратмир Мавлиев погынымашын участникше-влаклан оласе предприятий ден организаций-влакын нацпроект-влакым илышыш шыҥдарыме годым полышым ончыктымышт нерген каласкален.

Йодыш-влакым лончылымаште мемнан район деч 1 №-ан Калтаса кыдалаш школын директоржо Кутлубаева Наталья, Калтаса рӱдӧ район эмлымверын терапий пӧлкажын вуйлатышыже Маргарита Насибуллина, район администрацийын ЖКХ секторжым вуйлатыше, «Городская среда» проектын координаторжо Ляйсан Гильмишарипова участвоватленыт.

Погынымашын кокымшо ужашыштыже региональ проект комитет-влакын представительышт дене Кугу Качак ялсовет администраций вуйлатыше Геннадий Хайдаршин ден район администрацийын ЖКХ-ан секторжым вуйлатыше, «Городская среда» проектын координаторжо Ляйсан Гильмишарипова вашлийыныт.

Мемнан корр.