Воздушно-десантный войска-влакын кечышт годым Калтаса селасе «Победа» кинотеатрыште районысо воин-интернационалист-влаклан «В память 30-летия окончания боевых действий в Афгане» медальым кучыктеныт

Афган конфликтыште участвоватлыше салтак да военно-воздушный десант войскалаште служитлыше-влакым район администраций вуйлатыше Юрий Минзарипович Садыров, Янаул ола, Янаул ден Калтаса районласе военный комиссар Харисов Марат Хавыевич саламленыт. А нунылан медальым мемнан землякна, генерал-майор Виталий Шамшиевич Алеев кучыктен, тудат Афганистаныште служитлен.

Медальым кучыктымо годым кажне ветеран, Афганыште служитлыме жапшым уэш шарналтен, докан. Тушто чыланат иктӧр лийыныт: тыглай рядовойжат, сержантшат, офицержат, лейтенантшат – вет кажныже шке илышыж верч огыл кредалын, а йолташыжын илышыже верч. Виталий Шамшиевич дене пырля воин-интернационалист-влак «зеленкым», Кабулым, Панджерым, Кундузым, Баграмым шарналтеныт. Мыланна гын тиде ола-влак нимомат огыт ойло, а теве ветеран-влакын ушешышт курымешлан кодыныт. Таче тыге чучеш, пуйто чыла тидын нерген нуно шыргыжалын ойлат. Туге гынат, тушто ӱмырешлан кодшо йолташышт верч нунын шӱм-чонышт тачат ойгыра.

Кумло ий эртен. Но жап уш гыч тиде событийым ӱштын ок керт. Йолташ-влакын колымашышт, нунын авашт-влакын шинчавӱдышт, землянкысе, курыкысо илыш, йырваш вӱр… Афган сар СССР-ын историйыштыже ик эн трагический лийын, тушто мемнан 44 землякна участвоватлен. Лач тынар воин-интернационалистым тиде кечын медаль дене палемденыт. Конешне, нуно шукырак лийыныт, но кӧ дыр вес кундемыште ила, кӧ дыр ош тӱня дене чеверласен.

– Лач нине салтак-влак Шочмо элым аралыше ончыкылык рвезе-влаклан патриотический воспитаний шотышто пример лийын кодыт, – каласыш военный комиссар М.К. Харисов. Чынак, нунын подвигыштым нимогай награде дене аклаш ок лий. А нунын пашаштым таче ВДВ салтак-влак умбакыже шуят.

Пайремын торжественный ужашыже деч вара чыланат Сеҥымаш паркышке кайышт, тыште нуно воин-афганец-влакын памятникышт воктеке венок ден пеледышым пыштышт. Тиде кечынак нуно йолташышт-влакын шӱгарыштышт лийыныт.