Калегин ялсоветыште Физкультурникын кечыжым палемденыт

Физкультурникын кечыжым тений 10 августышто палемденыт. Тиде кече деч ончыч Калегин ялсоветыште кыр спорт ден турнир эртен. Тудо ойыртемалтше лийын. Спортын ветеранже, Калегин ялын чулым еҥже Владимир Васильевич Валикаев, велосипед рульышкыжо 16 кг кырым сакен, ялсоветысе яллашке эн виян еҥ-влакым кычалаш лектын. Тудо Марий Мераҥ, Морко, Кушна, Сылвий яллаште лийын. Мӧҥгыжӧ пычкемыш йӱдым гына толын шуын.

Таҥасымаште ийготыш шудымо йоча-влак веле огыл, тыгак илалше еҥ-влакат участвоватленыт. Сеҥыше-влакым кум тӱшкалан шеленыт. 18 ияш ийготан-влак коклаште икымше верым Марий Мераҥ ял гыч Кумушбаев Максим налын. Тудо кырым 90 гана нӧлталын. Кокымшо Калегин ял гыч Николаев Даниэл лийын, кумшо – Морко ял гыч Яикбаев Радион.

18 гыч 70 ияш-влак марте ийготан-влак коклаште икымше верым Кушна ял гыч Николаев Лев налын. Кырым тудо 140 гана нӧлталын. Кокымшо – Сылвий ял гыч Шамыкаев Владислав, кумшо – Калегин ял гыч Изиметов Андрей Евгеньевич. Тудлан изиш гына Марий Мераҥ ял гыч Вайтуков Юрий модын колтен.

70 ий деч кугырак ийготан-влак коклаште икымше верым Калегин ял гыч Валикаев Владимир Васильевич налын. Марий Мераҥ ял гыч Абдулгалимов Андриян кокымшо лийын.

Тиде мероприятийын организаторжо Валикаев Владимир Васильевич спорт ден кылым шукертак куча. Лач поро мут дене гына тудо школышто физкультурым туныктышыжо Вайтин Николай Пайметовичым шарна. Армий радам деч вара Николай Пайметович вигак Марий Мераҥ школышто физкультурым туныкташ тӱҥалын да ӱдыр ден рвезе-шамычым спортым йӧраташ кумылаҥден шоген. Сандене мемнан геройнат йӧратыме туныктышыжын кышаже почеш каен. Тудо 36 ий Марий Мераҥ школышто физкультурым туныктен. Тудо тыгак шкенжын тунемшыже-влак – Васильев Валентин Владимирович да Валикаев Артур Владимирович дене кугешна – нунат туныктышын корныжым ойырен налыныт да школышто физкультурым туныктеныт.

Сулен налме канышыш лекмекыжат, тудо пӧртыштӧ гына ок шинче. Ялыште эртыше ик мероприятият тудын деч посна ок эрте. Уло еш дене нуно марафонлаште куржталыт.