Яллаште илыше 57 тӱжем еҥ пенсийышке ешартыш тӱлам налеш

Башкирийысе яллыште илыше 57,1 тӱжем еҥ пенсийын страховой ужашышкыже эше ешартыш фиксированный тӱлам налын кертеш. Тидын нерген республикысе Пенсий фонд управлений пӧлкан вуйлатышыже Фоат Хантемиров каласен.

Кузе «Башинформ» агенстве увертарен, пашам ыштыдыме пенсионер-влак, кӧ ялозанлык сферыште 30 утла ий тыршен, страховой пенсий ужашышкыже 25% ешартыш оксам налын кертыт.

Июнь мучаште, Россий правительствын пунчалже дене келшышын, кугемдыме пенсийым налме шотышто ялозанлык сферысе профессий, производство перечень-влакым кугемденыт. Тушко ялозанлык технике ден оборудованийым олмыктышо-влак, ялозанлык объектлам оролышо-влакым пуртеныт. Тиддеч посна переченьышке тыгак ялозанлык сатум ыштен лукшо индивидуаль предприниматель-влакымат пуртеныт.

«Башинформ» ИА.