Калтаса ужара
+18 °С
Пылан
Все новости
Новости
16 Сорла 2019, 16:29

Амчемучашмыт эн сай муреныт да куштеныт

Амчемучашмыт эн сай муреныт да куштеныт«Амче вел» фольклор коллектив «Ший кандыра» эрвелмарий калык куштымашын регион-влак кокласе фестиваль-конкурсын Гран-прижым сеҥен налын

«Амче вел» фольклор коллектив «Ший кандыра» эрвелмарий калык куштымашын регион-влак кокласе фестиваль-конкурсын Гран-прижым сеҥен налын
Кодшо шуматкечын, 10 августышто, Калтаса селан рӱдӧ площадьше ик жаплан кугу куштымаш площадкыш савырнен ыле. Тыште шкеныштын хореографий мастарлыкыштым да артист талантыштым Марий Эл, Татарстан, Удмурт республике-влак, Свердлов область, Екатеринбург ола, мемнан республикысе Янаул, Балтач, Бурай, Дӧртӧльӧ да Калтаса район гыч творческий коллектив-влак ончыктеныт.
Кумло утла коллектив жюри ончыко шкенжын «кандыра» куштымашыжым луктын. Нунын кокла гыч Амчемучаш ял гыч артист-влак эн сай лийыныт. «Бытовой куштымаш» номинацийыште «Амче вел» куштымашым ямдыленыт, а сцене куштымашлан «Эх, Калтаса» куштымашым. Шке куштымаш композицийышкышт амчемучашмыт, пуйто, уло чоныштым пыштеныт. Тидым жюриат, ончаш толшо калыкат шижын. Кузе нуно тывыртатеныт! Нунын куштымашышт деч тугай кугу энергетика толын. Эн самырык участник Иван Петраев гын чылалан келшен. Тудым фестивальын специальный Дипломжо дене палемдыме.
«Амче вел» фольклор коллективын арам огыл сеҥен. Тудым Ангелина Шамыкаева ден Андрей Петраев вуйлатат. Коллектив икмыняр ий чолган пашам ышта. Тудым эше 1987 ийыште негызленыт, но тудлан у шӱлышым, содыки, Ангелина ден Андрей пуртеныт. Коллектив кум группа гыч шога: мурышо, йоча да гармонист-влак ансамбль. Нуно район сценыште гына огыт выступатле, тыгак концерт дене пошкудо районлашке коштыт, тӱрлӧ конкурс ден фестивальыште участвоватлат. Нуно тиде фестивальын кокымшо гана лауреатше лийыныт. Тевые ынде – Гран-при. Саламлена!