Калтаса ужара
+20 °С
Пылан
Все новости
Новости
16 Сорла 2019, 18:18

Кодшо арнян район администраций вуйлатыше Ю.М. Садыров Калмиямучаш ялсоветыште калык дене вашлиймашым эртарен

Депутат-влак. Администраций. Калык. Кушто лушкыдо звено?Кодшо арнян район администраций вуйлатыше Ю.М. Садыров Калмиямучаш ялсоветыште калык дене вашлиймашым эртарен

Район администраций вуйлатыше дене чон почын мутланаш шонышо-влак моткоч шуко лийыныт. Ме Калмиямучаш ялсовет зданийышке пуренат ышна шукто, коридорышто мемнам 10-15 еҥ вучен шога ыле. Ончыч чыла тидыже ӧрыктарыш. Молан манаш гын, шыжым гына тиде ялсоветыште калык дене вашлиймаш эртыш. Тышке тунам 2-3 еҥ гына толын ыле. Тӱҥ йодыш-влак тунам мланде дене кылдалтше лийыныт. Икманаш, ойырымо мланде пай-влакым кузе пайдалын кучылташ. А тиде гана тынар шуко калык погынымаш изиш ӧрыктарышат. ӧрыктарыде ок керт, вет вашлиймашке тыгак Нефтекамск оласе ТНТ-24 телеканал гыч корреспондент-влакат толын ыле. А мо вара лийын? Тыгай йодыш вигак ушыш толын пурен.
А кузе ончыкыжым пален нална, нимат тыгай лийын огыл улмаш. Калыкын йодышыжо шуко погынен да нуно район администраций вуйлатышылан пуаш лийын. А мо оҥайже, чыла тиде йодышым верыштак решатлаш лиеш улмаш. Очыни, нигӧат ӧрдыж гыч ок тол да Калмиямучаш ялысе памаш гыч каза-влакым поктен ок колто, шуҥлатше меҥге-влакым ок тӧрлӧ, шӱйын волышо пӧртвуйымат ок олмыкто.
Тӱҥ шотышто тыгай йодыш-влак лийыныт.
Эше кодшо вашлиймаштак калмиямучашмыт ялысе волейбол командым школышко модаш огыт пурто манын, вуйым шийыныт ыле. Тиде ганат тиде йодышымак нӧлталме ыле. Но ынде нуно икте-весышт коклаште кунам да могай жапыште спортзалым почаш кӱлмӧ нерген, кӧ тудым почеш да нунын деч вара кӧ спортзалым эрыкташ тӱҥалеш – кутырен келшен огыт керт.
Калык дене вашлийме жапыште тӱҥ проблемым пеш сай ужаш лиеш ыле. Тиде – верысе самоуправленийын звеношт-влак коклаште лушкыдо кыл. Ялсоветыште калык дене вашлиймаш, сход-влак шагал эртаралтыт да калыкат тыште чолган ок участвоватле. Нуным чӱчкыдынрак эртараш гын да калыкат тыште чолганрак участвоватлаш тӱҥалеш гын, очыни, район администраций вуйлатыше деке йодышыжат тынаре шуко ок лий ыле.
Верысе самоуправлений механизмыште кугу рольым тыгак депутат-влак модыт. Ялыште нуно калык дене верысе власть коклаште ушен шогышо звено лийшаш улыт. Кызыт чыла тиде Калмиямучаш ялсоветыште ок шижалт.
Конешне, тиде вашлиймаште моло йодыш-влакымат ончымо лийын, кудыжым гын, район полыш деч посна нигузе решатлаш ок лий. Тиде – Павасола ялыш газым пуртымаш, Ваныш-Калмиямучаш корным тӧрлымаш да вара маршрут автобус колтымаш, Павасола ялыште шӱкшак кышкыме верым пытарымаш да молат.
– Чыла нине йодыш-влакым ме ончена да нунын деч вара кӱлеш пунчал-влакым луктына, – каласыш Ю.М. Садыров, калык дене вашлимйашым мучашлышыла.