Калтаса ужара
+21 °С
Пылан
Все новости
Новости
20 Сорла 2019, 15:45

Киндым погаш тӱҥалыныт

Киндым погаш тӱҥалынытРайонышто эн ончыч уржам погаш шке комбайныштым пасушко «Победа» ООО-н Кугу Качакысе производственный участкын пашаеҥже-влак луктыныт

Фото авторын
Фото авторын
Районышто эн ончыч уржам погаш шке комбайныштым пасушко «Победа» ООО-н Кугу Качакысе производственный участкын пашаеҥже-влак луктыныт
Кодшо кугарнян, 16 августышто, Кугу Качакыште уржам погаш тӱҥалыныт. Срок дене ончалаш гын, ик тылзылан вараш кодмо. Тыгайже шукертак лийын огыл. Но тидлан ӧраш нимолан. Пытартыш кум ий жапыште киндым вараш кодын погалтеш да эше йӱран игече годым. То шошо вараш толеш, кодший да туддеч ончыч шошо вараш кодын толын ыле, то кеҥеж мучко йӱр йӱреш, тенийсе гай, тыгай годым кинде ок шу, а шушыжым погаш кӱлеш.
Пытартыш ийыште игече мемнам тӱрлӧ сюрприз дене ӧрыктара…
Кугу Качак ялысе комбайнер-влакым мый Кургак ял шеҥгелне, Бурай район дене границыште, верештым. Курык вуйышто солен пыштыме уржа кошкен. «АCROS» ден «Нива» комбайн-влак уржам погеныт. Пасу мучаш гыч, кушто шурным погеныт, Керей эҥер пеш мотор койын йоген. Кум удмурт ял – Кургак, Изи Качак, Кугу Качак, пуйто кидкопаште верланеныт. Умбалнырак эше Качкинтурай койын шинча. Но шочмо пӱртӱсын моторлыкышым комбайнер ден водитель-влаклан ончен шогаш жапышт уке – нуно шурым погат да шупшыктат. Игече сай шогымо годым, кажне минутым пайдалын кучылтман. Кӧ пала, могай лиеш ончыкыжым кеҥеж.
Уржам «Нива» комбайн дене Вадим Мингареев да АCROS» дене Рафит Тимирьянов тӱредыныт да погеныт. Вадим Раисович дене ме ончычат Кугу Качак пасулаште вашлиялтынна. Коло ий утла тудо шочмо ялыштыже тырша. Газетыштат ме тудын ик эн ончыл механизатор нерген ик гана веле огыл возенна ыле. Тений тудын дене пырля тыгак Евгений эргыже тырша. Тудо армий радам гыч пӧртылын да ачажылан полшаш лийын. Ончыкыжым, можыч, ачаже, Вадим Раисович семынак сай специалист лиеш.
Мингареев Качкинтурай ял гыч улеш. А теве Рафит Салихович Бурай район гыч. Кугу Качакыш тудо сезон годым пашашке толеш. Шошым да шыжым «Джондир» дене мландым куралеш да ӱда. А кызыт киндым пога. Кугу Качакыш тудо оксам ыштен налаш толеш.
Кажне пашаште сай специалист-влак аклалтыт. Тидын шотыштат ялозанлыкыштат.
Пырчым идымышке водитель-влак Юрий Насипуллин, Виталий Минликаев да Владимир Смагулов «ЗИЛ», «ГАЗ» да «КамАЗ» автомашина-влак дене шупшыктеныт. Тыште тудым ЗАВ-10 машинан машинистше Виктор Уракбаев эрыкта да сортироватла. Поген налме уржам вигак ӱдаш кучылташ тӱҥалыт. Кокияшым ӱдашлан пасум ямдылыме.
– Кызыт ме, икманаш, чыла фронтыштат пашам шуктена, – ойла производственный участке вуйлатыше Назиф Абдуллин. Уржа-сорла тӱҥалынна, сенажым оптена, кокияшлан да кылмаш пасум куралына. Игече начарлан кӧра паша вараш кодеш. Эн кугу тӱткышым ме кызыт, конешне, уржа-сорлалан ойырена. Игече кызыт сай шога, сандене киндым шукырак поген налаш манын, чыла ышташ кӱлеш. уржам чыла соленна. Кызыт Андрей Ахмадыршин «Полесье» самоходный косилке дене шожым сола. Мо шуын – тудым погаш кӱлеш.
Шыдаҥ гына эше кунам шуэш, пале огыл.