Калтаса районышто полумарафоным куржталмаш эртен

Республикысе йӱдвел-касвел районлаже гыч йӱлашкак пурышо полумарафон куржталаш йӧратыше-влакым ик вере чумырен

24 августышто районышто йӱлашкак пурышо полумарафон эртен. Тудо полицийын капитанже, Чечен Ресупбликыште геройла колышо Юрий Мильсонович Алексеевлан лӱмдалтын. Куржмаште чылаже 200 спортсмен участвоватлен.

Мемнан районысо чыла ялсовет гыч спортым йӧратыше-влак лийыныт, тыгак Нефтекамск, Уфа олала гыч, Янаул, Краснокам, Мишкан, Бурай районла гычат куштылго атлетикым йӧратыше спортсмен-влак толыныт ыле. Старт деч ончыч, пайрем построенийыште, чыла участникым район администраций вуйлатыше Ю.М. Садыров саламлен.

Тудо тыгай куржталмашын кугу пайдам кондымыжо да кушкын толшо тукымым таза илыш-койышым намияш кумылаҥдымыже нерген каласен.

Тидымат палемдаш кӱлеш, очыни – куржталмаште пелыже икшыве-шамыч лийыныт. Юрий Минзарипович пайрем шӱлышыштӧ район администрацийын Чап грамотыжым спортын ветеранже, спорт дене кылым чолган кучышо-влаклан кучыктен. Тыгай наградым вуйлатышын кидше гыч Евгений Вахитов, Филипп Петраев, Григорий Тимирбаев, Валерий Насибуллин, Зинур Кунафин, Борис Ибаев да Виталий Васиев налытын.

Полумарафонын участникше-влакым тыгак Башкортостан Республикысе Кугыжаныш Погын – Курултайын депутатше Г. Юмадилов саламлыш. Тудо шке депутат пашаже дене районыш толын улмаш. Тиддеч посна Булат Гумерович куржталмаште участвоватлен да шке ийготшылан келшыше дистанцийым куржын эртен.

Тыгак пайрем построенийыште Россий МВД-ын Калтаса районысо пӧлкажын вуйлатышыже Э.В. Ляпустин выступатлен. Тудо кӱчыкын Юрий Алексеев нерген каласкален да пӧлкасе пашаеҥ-влак шке йолташыштым нигунамат огыт мондо да тудым ӱмыр мучко шарнен илаш тӱҥалыт манын каласен. Пӧлкан шуко пашаеҥже тыгак тиде куржталмаште участвоватла.

Куржталмаш Краснохолмский гыч райрӱдӧ марте шуйнен. Ваныш корнывожышто да Калмаш ял воктене ийгот тӱшка дене промежуточный финиш лийын. Тений Калтаса молумарафонышто абсолютный чемпион лӱмым Амзя поселко гыч Эмиль Сирязев сеҥен налын. Кокымшо Мишкан район гыч Владислав Яндыганов лийын, кумшо тыгак Мишкан район гыч Вадим Кутлияров.

Ӱдырамаш-влак кокла гыч икымше Нефтекамск ола гыч индешымше классыште тунемше Гульназ Гимадрисламова лийын, кодшият тудак сеҥен ыле. Кокымшо верым тыгак Нефтекамск ола гыч Мария Валтиева налын, кумшо – Ӱлыл Качмаш ял гыч Регина Ахиярова лийын.

Эмиль Сирязев полумарафоным 1 шагатат 45 секундышто куржын толын. Полумарафонын рекордшо – 56 минутат 57 секунд. Тудым 2000 ийла тӱҥалтыште Кугу Качак гыч Борис Насипуллин шынден лийын да тудым кызыт иктат эртен огыл.

Фото-влакым "Вконтакте" сайтыште мемнан группышто ончаш лиеш.