Кугыжаныш Россий флаг кече лӱмеш райрӱдштӧ пайрем мероприятий эртен

Элнан кугыжаныш символикыже-влакым гербым, гимным, флагым калык пагала да жапла. Шочмо элым йӧратымаште нуно кугу рольым модыт. Ме эре кугу кумыл дене кунам мемнан спортсменна-влак лӱмеш Россий Федераций гимным чӱктат колыштына да ош-канде-йошкар флагым нӧлталмыштым куанен ончена.

Районышто але ялсоветыште кеч-могай мероприятийымат гимн дене почаш тыршена, флагым нӧлталына. Нуно мемнам иктыш ушен шогат. Тыге ойлен шке выступленийыштыже Россий флаглан лӱмдалтше мероприятийыште район администраций вуйлатыше Ю. М. Садыров.

Калтаса селан рӱдӧ площадьыштыже артист-влаклан выступатлаш сценым да почетан уна-влаклан шинчаш верлам ыштен ямдылыме ыле. Мероприятийыште села калык, предпритяий ден учрежденийлаште тыршыше-влак участвоватленыт.

Пайрем эртыме жапыште награде-влакым кучыктеныт. Район администраций вуйлатыше Башкортостан Республикылан 100 ий темме вашеш юбилей медаль-влакым кучыктен. БР-се вуйлатышын пашажым шкетен шогышо Радий Хабировын пунчалже почеш тыгай медальым Максимова Зоя Валеевна, Альминов Анас Масгутович, Шарифуллина Мария Николаевна, Шамкаев Марат Байрамович налыныт. Нуно район вияҥмашке изи огыл надырым пыштеныт. БР-се Кугыжаныш Погын – Курултайын чап грамотыж дене районысо спорткомитетын вуйлатышыже Кугубаев Вячеслав Имасевичым палемдыме. Культура пашаеҥ-влак Матвеева Лилия Ивановна ден Шамсутдинова Зелина Тимирьяновнам республикысе культура министерствын Чап грамотыж дене наградитлыме.

Концерт программым пеш сай ямдылыме ыле. Нуным районысо Культура пӧртын пашаеҥже-влак ямдыленыт. Ончаш толшо калыкым мурышт дене Кристина Русиева, Арсентий Ачибаев, Ольга Алкаева, Виктор ден Ирина Карасевмыт, Элина Матвеева, калык куштымаш дене «Эрви» ансамбльын солистше-влак – Алла Семенова ден Виктор Ванюшкин куандареныт.