Эртыше каныш кечылаште «Демографий» нацпроект почеш Российысе пенсионер-влакын VI спартакиадышт тӱҥалын

Тудым почмаште мемнан район гычат делегаций лийын. Кузе чыла тиде лийын, мемнан газетлан «Икоян Россий» партийын верысе исполкомжын секретарьже Зоя Валеевна Максимова каласкалыш.

– Тиде мероприятий моткоч кугу. Тудо чылаже Российын 76 регионжо да 7 йот эл гыч 700 утла спортсменым поген.

Таҥасымашын участникше-влакым Башкортостан Республикысе вуйлатышын пашажым шуктен шогышо Радий Хабиров саламлен.

»Мыланна Башкортостаныште Российысе пенсионер-влакын Спартакиадыштым эртараш кугу чап», – каласен регион вуйлатыше. – Ме тыланда кугу тӱткышым ойыраш ямде улына. Тек тиде кечылаште тыланда Уфа ола шарнаш кодшо манын ме чыла ышташ тыршена, тек ончыкыжымат мемнан мотор да унам вашлияш йӧратыше республикышкына толмыда гына шуын шогыжо. Тыланда сеҥымашым, тазалыкымм тыланем».

Мероприятийым почмаште тыгак Российысе спорт министрын алмаштышыже Марина Томилова, Россий пенсионер-влак ушемын вуйлатышыже Валерий Рязанцев участвоватленыт. Марина Томилова спортын ветеранже-влаклан, кӧ ГТО комплекс нормативым темен, шӧртньӧ медаль-влакым кучыктен.

Спартакиадыште спортын шым видше дене таҥасеныт: ӱстембал теннис, иймаш, куштылго атлетике, комбинированный эстафете, лӱйкалымаш, шахмат да дартс.

Спартакиадым почмаште Калтаса районын делегацийын составыштыже лийыныт: районысо ветеран-влак ушемын вуйлатышыже Евгений Иликбаевич Ильчигулов, Калтаса районын Почетан еҥже Михаил Илтубаевич Илтубаев, районысо татар-влак исполкомын вуйлатышыже Резеда Самиевна Асадуллина, Зинаида Борисовна ден Владимир Сабирьянович Апсабировмыт, район администраций пелен общественный совет вуйлатыше Владимир Алексеевич Ляпустин, шахматист Сергей Александрович Айдаков, спортсмен-активист-влак Петр Ижболдин, Евгений Илтыбаев, Зинаида Алексеева.

Мероприятий чылалан келшен.