Районысо туныктышо-влак у тунемме ийлан паша планым каҥашеныт

1 №-ан Калтаса КШ пелен районысо туныктышо-влакын погынымашышт эртен. Тушто чыла школ да йочасад гыч делегаций-влак лийыныт. 2019-2020 тунемме ийлан паша планым ыштеныт, педагогика коллектив-влаклан пашам саемден колтымо шотышто темлымаш-влакым ойленыт. Поснак кугу тӱткышым туныктымашын качествыжлан ойыраш палемдыме.

Школ коридорышто выставкым организоватлыме ыле. Тыште ЦВВ, Краснохолмский селасе «Шонанпыл» йоча усталык пӧртын воспитанникше-влакын пашаштым ужаш лийын. «Шонанпылыште» тений гыч лапчык гыч курчак-влакым ышташ тӱҥалыт. Йоча усталык пӧртын туныктышыжо-влак погынымашын участникше-влаклан мастер-классым ончыктеныт.

Погынымашым 2 №-ан Калтаса кыдалаш школын тунемшыже-влак почыныт. Нунын почеламутым лудын пуымекышт, пуйто чынжымак у тунемме ийыш логалме гай чучын.

Погынымаште саламмут дене тыгак район администраций вуйлатыше Ю.М. Садыров, БР-се илыме да чоҥымо надзор шотышто Кугыжаныш комитетын вуйлатышыже И.М. Шафиков, БР-се образований министерствын кугыжаныш итоговый аттестаций ден образованийын кечествыжын оценкыже шотышто тӱҥ специалист-экспертше И.В. Иванова выступатленыт.

«Ключевые ориентиры развития муниципальной системы образования в рамках реализации национального проекта «Образование» теме дене районысо образований пӧлкан вуйлатышыже Э.Р. Гарипова выступатлен. Чыла выступленийыште спикер-влак школ-влакын сай велжымат, удажымат ойленыт. Туныктышо-шамычлан шке квалификацийыштым чӱчкыдын кӱкшемден шогаш кӱлеш. Погынымаште тыгай темлымаш-влак лийыныт.

Мучаште школ, йочасад моло тунемме учреждений-влакым у тунемме ийлан ямдылыме шотышто сеҥыше-влакым палемденыт. Сеҥыше-влак коклаште 1 №-ан Калтаса КШ, Павасола КШ, Краснохолмский селасе «Теремок» йочасад, Савакмарийысе «Рябинушка» йочасад да ДЮСШ.

Моло педагогика коллектив-влакым награждатлыме нерген газетнан сайтыштыже лудын кертыда.

Тыгак Бакшкортостан Республикылан 100 ий темме вашеш юбилей медаль дене педагогика пашан ветеранже-влакым палемденыт. Тиде – Павлова Татьяна Афанасьевна, Ибрагимова Римма Инсафовна. Тыгак районысо туныктышо-влакым моло ведомственный награде-влак денат палемдыме. Калтаса ДЮСШ-ан тренер-преподавательжым Ахметдинов Евгений Николаевичым БР-се спорт да самырык-влакын политикышт шотышто министерствыже «Лучший тренер Республики Бакшкортостан» знак дене палемден. Министерствын Тауштыме серышыже дене физкультурым туныктышо ятыр туныктышым палемдыме.