Полицийын капитанже Юрий Мильсонович Алексеевым шочмо кундемыштыже шарнат да аклат

Шым ий ончыч Чечен Республикыште Башкортостан гыч сводный отрядше гыч 4 полицейский колымо нерген увер кӱдырчыла рашкалтыш. Нунын коклаште мемнан районын шочшыжо, Россий МВД-ын Калтаса районысо пӧлкажын ГИБДД-ын кугыжаныш инспекторжо Алексеев Юрий Мильсоновичат лийын.

2012 ийыште тиде событий нерген СМИ чыла каналже ойлен: «17 августышто Чечен Республикысе Алхан-Кала населенный пункт воктене Башкирийысе полицейский-влакын служебный автомашинаштым, тушто ныл еҥ лийын, лӱйкалыме. Тиддеч вара, машинаште лийше чыла еҥ колен…».

Тидлан шым ий эртен. Кажне ийын тиде кечын, 17 августышто, районышто Ю.М. Алексеевым шарныме лӱмеш мероприятий-влак эртаралтыт. Теният тыгак ыле. Россий МВД-ын Калтаса районысо пӧлкажын вуйлатышыже, полицийын подполковникше Э.В. Ляпустин, моло вуйлатыше-влак, полицийын личный составше, ветеранмыт, пӧлкан общественный советын членже-влак тиде кечын пашам пырля ыштыме йолташыштым, пелашыжым, ачаштым шарналташ погыненыт. Ик жап шып шоген нуно шкеныштын служебный порысыштым шуктышыла колышо йолташыштым шарналтеныт. Полиций пӧлка воктен верланыше обелиск воктеке пеледышым пыштеныт. Вара Юрийын шочмо Калмиямучаш ялышкыже каеныт – тудын шӱгарышкыже пеледышым пышташ да тудым шарналташ. Юрий Алексеев нерген шуко поро мутым каласыме ыле. Тудо шке пуымо мутшылан кеч-кунамат оза лийын – шукташ тыршен, тудым пашаштат, чыла палымыжат пагаленыт да акленыт. Ачаже ден аважлан ӱшанле эҥертыш, сай да поро йолташ лийын.

Россий Федераций Президентын пунчалже почеш, полицийын капитанже Юрий Мильсонович Алексеевым Мужество орден дене палемдыме.