Районысо озанлыклаште киндым погат да кокияшым ӱдат

Шыже ялозанлыкыште шуктымо пашам иктешла. Киндым ончен куштышо-влакын тиде пагатыште каныш кечышт уке манаш лиеш. Иканаште икмыняр пашам шуктат – шурным погат, кокияшым ӱдат. Чыла тиде пашам шуктымо нерген мыланна ИКЦ-ын агроном-консультантше Борит Мухтаров каласкалыш.

– Тений киндым погаш ик тылзе вара тӱҥална, – ойла Борит Баязитович. – Тидлан амал – йӱран да йӱштӧ кеҥеж.

Туге гынат, тачысе кечылан чыла кокияшым поген пытарыме, ынде икияшым погаш тӱҥалме. А шыдаҥ але шуэш гына. Гектар гыч лектыш нерген ойлаш але эр. Тудым эше поген налаш кӱлеш. Мутлан, южик озанлыкыште 30 центнер дене кырен налыт, а южикте – 10 центнер дене веле. Гектар гыч 30 центнер дене «Победа» ООО-н Кугу Качакысе производственый участкыште шожым поген налме. Тудым апрель мучаштак ӱдымӧ ыле. Арам огыл, очыни калыкыште ойлат: «Шожым лавырашке шынде – киндан лият». Тиде озанлыкште пурсат начар огыл шочын. Тольык шуко йомдарыме – йоген. Пурсам погыш неле улмылан кӧра, районышто шуко озанлык тудым ӱдаш огеш кӧнӧ. Лач пытартыш кок ий жапыште гына пурсам ӱдымӧ площадь 5-6 гана кугемын. Тудым ӱдаш кӱлеш. Эше тудо шыдаҥ деч 1,5-лан шергырак.

Пасушто шӱкшӱдо кушкеш гынат, сай огыл. Тений кеҥежым йӱр чӱчкыдын лие. Кеч шуко озанлыкыште химпрполкым эртареныт гынат, тудын пайдаже уке манаш лиеш. Шӱкан пасулан, пырче вараш шумылан кӧра шурно тений ночко. Тудым идымыште кошташ кӱлеш.

Кокияшым ӱдымаште тений стратегий вашталтын. Районысо озанлык-влак уржам ӱдымӧ олмеш тритикалем да кокшияш шыдаҥым ӱдаш тыршат. Ужалыме рынкыштат нуным шукырак налыт да кормалык качествыжат нунын сай.

Районышто кокияшым 2000 гектарыште ӱдаш шонат.