Теҥгече, икымше классыш тунемаш кайыше 330 йочалан икымше оҥгыр йоҥгалтын да тудо нуным икымше урокыш ӱжын

Игече йӱштӧ, но кечан ыле тиде шыже кече. Пеш моторын чийыше ӱдыр ден рвезе-влак, кидыш сылне пеледыш аршашым кучен, школышко вашкеныт. Вет тушто кужу кеҥеж каникул деч вара ик классыште пырля тунемше йолташ, туныктышо дене вашлиймаш нуным вучен. У тунемме ий пайрем линейке да теме дене кылдалтше класс шагат-влак гыч тӱҥалын.

Районысо школлаште тений 3180 тунемше шинчымашым погаш тӱҥалеш.

Тиде тунемме ий районысо кум школлан – 1 №-ан Калтаса КШ, 1 да 3 №-ан Краснохолмский КШ-влаклан поснак ойыртемалтше лиеш. Тушто «Образований» нацпроект почеш «ТОЧКА РОСТА» цифр да гуманитар образованийын рӱдерже-влак почылтыт.

Тиде ий 2 №-ан Краснохолмский кыдалаш школланат ойыртемалтше – тудо шкенжын 50 ияш юбилейжым палемдаш тӱҥалеш.

Конешне, тиде тунемме ийым поснак икымше классыш тунемаш толшо-влак шарнен кодыт. Вет нунылан чыла у – школат, класс-влакат, икымше оҥгырат, икымше туныктышат… Школ-влак тиде кечын нуным чапландареныт – шке коллективышкышт ушеныт.

2 №-ан Калтаса кыдалаш школышто икымше классыште 46 тунемше шинчымашым погаш тӱҥалеш. Латик ийлан школ нунын кокымшо пӧртышкышт савырна. Икымше туныктышо-влак Д.Г. Хазиева ден С.А. Хузина дене пырля нуно азбукым шымлаш тӱҥалыт, возаш да лудаш, шотлаш нуным туныктат. Ий гыч ийыш нуно шинчымашыштым келгемден толаш тӱҥалыт. Тек нунын шинчымаш корнышт пиалан лиеш.