Биктимировын кресаньык-фермер озанлыкыштыже кокияшым ӱдат

Ожнысек кресаньык-влак кугу тӱткышым уржалан ойыреныт. Уржа нуным кеч-кунамат кинде шагал шочмо жапыште утарен коден. Тудо, моло культура семын, начар игече годымат сай лектышым пуэн кертеш.

Биктимировын кресаньык-фермер озанлыкыштыже тений уржалан 100 гектар пасум ойырымо лийын. Гектар гыч 19 центнерым поген налыныт. Тиде сай лектыш, палемда озанлык вуйлатыше Герман Афанасьевич. Кызыт озанлыкыште уржам ӱдат.

– Йӱрлан кӧра тений ӱдаш вараш кодна, – ойла Герман Афанасьевич. – Туге гынат, уржам кодшийсе гаяк ӱдаш шонена. Кеҥеж тӱҥалтыште шӱкшудо деч химпрополку ыштенна, дискан тырма-влак дене мландым обрабатыватленна. Вара тырма дене эртенна. Мыйын шонымаште лектыш сай лийшаш.

Тиде пасу Кӧкыш ял деч километр ӧрдыштӧ, Кӱшыл Тиктем ял деке кайымаште верланен. Тыште ме ӱдышӧ агрегатым ужна – кок сеялке дене МТЗ-82 трактор пашам ышта ыле. Трактор руль воктене – механизатор Геннадий Биктимиров, кресаньык-фермер озанлык вуйлатышын эргыже; селякыште – Мишин Александр ден Валиуллин Сергей. ӱдаш пырчым нунылан ГАЗ-53 трактор дене Биктимиров Рудик шупшыкта. Пашам ыштыма гыч коеш, звено шке пашажым сайын пала да шукта. Пасун кугу ужашыжым ӱдымӧ. Пасу мучаште эше ик агрегат пашам ыштен. Механизатор Андрей Пайтуллин ДТ-75 трактор дене пасум тырмален. Тиддеч ончыч тудо Т-150 трактор дене пасум дисковатлен.

– Механизатор да моло пашаеҥ-влак озанлыкыште опытан улыт да шке пашаштым палат, – ойла Герман Афанасьевич. – Нунын почеш ончен кошташ ок кӱл, шӱдымӧ пашам шуктат.

Тений шошым мый Биктимировын озанлыкыштыже лийынам. Район администрацийын ялозанлык пӧлкажын комиссийже озанлыклаште кокияшын пырчын кылмымыжым текшырен. Биктимировын кресаньык-фермер озанлыкыштыже уржа телым пеш сай илен лектын. Сандене нимом активироватлаш ыле. Тыгай результатышке шыжым жапыштыже да сай качестве дене ӱдымылан кӧра шуымо.

Озанлыкыште уржа-сорла умбакыже шуйна. Чылаже пырчым 600 гектарыште ӱдымӧ. 250 гектарыште поген налме. Уржам тичмашнек погымо, кызыт шожым погымаш мучашке лишемеш. Тудын лектышыже гектар гыч 20 центнер дене. Шож деч вара шыдаҥым погаш тӱҥалыт.