Калтаса районыш Константин Толкачев паша-влак дене толын каен

4 сентябрьыште мемнан районыш Башкортостан Республикысе Кугыжаныш Погын – Курултайын вуйлатышыже Константин Толкачев толын

Паша поездке годым Константин Борисович районышто чоҥымо объект-влакым ончен, тӱҥ шотышто Краснохолмский селасе 2 №-ан кыдалаш школым пужен ыштыме дене палыме лийын.

Умбакыже республикысе законодательный властьын спикерже районысо художественный самодеятельностьын отчет концертшым почмаште лийын. Мут толмашеш каласен кодена, артист-влак у костюм-влак дене выступатленыт. Тудым «Культура малой Родины» «Икоян Россий» партийын проектше почеш налме.

Константин Толкачев тыгак районысо общественность ден пашаче коллектив-влак дене вашлийын.

– Районышто тыгай сай вашталтыш-влак лийын шогымылан мый куанем веле, – каласыш тудо.

Шке выступленийыштыже Константин Толкачев медицине, образований, цифр экономике вияҥме йодышлаште поснак чарналтен. Вет лач нуно националь проект-влакын эн тӱҥ направленийже улыт. Чыла тиде, Константин Борисовичын мутшо почеш, ончыкыжым, вич ий жапыште, калыкын илышыжым сай велыш вашталтышаш.

– Ресупблике вуйлатыше-влакым тыгак демографий йодыш тургыжландара, – палемдыш Константин Толкачев. – Сар деч вара республикыште 160000 йоча шочын гын, то кызыт пел ий жаплан улыжат 19,6 тӱжем веле.

– Кӧлан чыла тидым чоҥена, – йодышым пуэн тудо. – Очыни, окса чылаж годымак чыла ыштен ок керт. У формат-влакым кычалаш тӱҥалына, – палемдыш тудо.

Мучаште Константин Борисович вашлиймашке погынышо калыкын йодышыжлан вашештыш.

Паша поездкыште Константин Толкачевым район администраций вуйлатыше Юрий Садыров, Башкортостан Республикысе Кугыжаныш Погын – Курултайын депутатше Рамзиль Низамутдинов сопровождатленыт.