Чодыра поянлыкым шукемдат

«Калтаса чодыра» автоном учрежденийыште чодырам ончен куштымо чыла паша шукталтеш. Тыште шкеак нӧшмым ямдылат, тудым ойыркалат, посна оборудованиян цехышт уло, чодыра питомниклаште озымым ончен куштат, вара шындат да вич ий ончат. Кажне ийын предприятий 200 утла гектар чодырам шында.

Чодырам шындыме дене гына нунын пашашт огеш пыте. «Дӧртыльӧ лесничестве» ГБУ дене ыштыме контракт почеш «Калтаса чодыра» АУ тыгак тўрлӧ чодыра-технике пашам шукта, чодырам пожар, тўрлӧ копшаҥге да чер деч арала. Нунын пожар ваштареш кучедалме техникыштат, оборудованийыштат уло. Кеҥеж мучко тул ваштареш кучедалме ятыр пашам шуктат: йўд-кече дежурствым намият, минерализироватлыме полоса-влакым ыштат, чодырам шўкшак деч эрыктат, аншлаг-влакым шогалтат да моло пашамат шуктат.

Кажне ийын предприятий чодырам араламе мероприятий-влакым эртара – ик тўжем утла гектар кумдыкышто чодырам копшаҥге да чер деч арала. Санитарно-тазартышашлан чодырам шуэмдат.

– Тений ме 18,2 гектар кумдыкышто у культура-влакым шындышна, – ойла «Калтаса чодыра» АУ-ын вуйлатышыже Г.Ш. Габсамов. – 85 гектарыште кўлеш вере пушеҥгым шындыме, 15 гектарыште озымым шындаш мландым ямдылыме. Озымна шкенан, тудым Надеждин питомникыште ончен куштена.

Тиде питомник эл мучко чапланен. Совет жапыште тудо ятыр ий «Образцовый» лўмым нумалын. Тушто ончен куштымо кушкыл-влакым мемнан республикыште веле огыл, тыгак пошкудо регионлашкат ужаленыт. Мемнан жапыштат тудо ончычсо чапшым йомдарен огыл. Тений кож, пўнчӧ, куэ озымым Челябинск область, Пермь кундемласе чодыра озанлыклашке наҥгаеныт.

Пушеҥге-влакым шындыме деч посна ме тений эше 161,3 гектарыште пушеҥгым шуэмденна, 17 гектарыште санитарный пашам эртаренна. 310 гектарыште икмыняр ий ончыч шындыме пушеҥге-влакым онченна, шудым соленна. Мемнан чылаже 18 тўжемат 784 гектар чодыра фондна уло.