«Телылан ямдылалтына»

– Мемнан предприятийнан тўҥ задачыже – пӧрт кӧргысӧ инженер сетьым: шокшо да вўд пуымашым, канализаций да электроснабженийын нимогай кўрылтыш деч посна пашам ыштымыже, – ойла Альберт Минзаирович. – Тыгак ме подъезд-влакым олмыктена, пӧртвуй леведышым вашталтена, пєрт да моло зданий-влак йыр отмосткым уэмдена.

Арам огыл калык коклаште тыге ойлат: озанлыкым сай кучаш манын, кажне кечын кушто-гынат пудам кырыман. Мемнан дене тыгай «озанлык» – 154. Краснохолмский селаште шуко пачеран 117 пєрт да Калтасаште – 37. Виктарыше компаний манын мемнам каласаш гын, тиде чын огыл. Вет ме обслуживатлыше предприятий лийын кодына, пӧрт комитет-влак дене договор почеш пашам ыштена.

Ий еда талук мучаште да шушаш ий тўҥалтыште «УЖХ» ООО шуко пачеран пӧртлаште илыше калык дене погынымашым эртара. Тыште лектын шогышо проблеме-влакым ойырат. А чыла погынымашым эртарымеке да олмыкташ кўлмӧ пӧртын ужашыжым але коммуникацийым ончен лекме деч вара тудым кунам олмыкташ кўлмӧ жап палемдалтеш. Кушто дыр вигак олмыкташ тўҥалман, а кушто дыр ты сомылым варарак ышташ лиеш. Тыге шушаш ийлан пӧрт-влакым олмыктымо план ышталтеш.

Тений подъезд-влакым капитально олмыктымо республике программе почеш мемнан районышто шуко пачеран 13 пӧрт уэмдалтын, 12-шо – Краснохолмский да Калтаса селалаште, нуным «УЖХ» ООО-ын обслуживатла. Чыла пашам капремонтын региональ операторжо шукта, кеч тўҥ подрядчик ӧрдыж гыч улеш гынат, пашан 50 процентшым «УЖХ» ООО шукта. Тиде нӧрепыш омсам да пӧрткоклаш люкым вераҥдымаш, электропроводкым олмыктымаш, пӧрт йыр отмосткым ыштымаш. Предприятий палемдыме план почешат олмыктымо пашам шукта. Штукатур-маляр-влак кум бригаде Краснохолмский селаште пашам ышта, иктыже – Калтаса селаште. Нуно сезон дене найм договор почеш пашам ыштат. Ий еда «УЖХ» ООО сезон пашалан 50 утла еҥым налеш. Тиде кеҥежлан штукатурно-малярный пашам шукташ да телылан пєртвуй леведышым лум деч эрыктымаш.

Предприятийыште слесарь-сантехник, плотник, электрик да сварщик-влак пашам ыштат. Пӧрт кӧргысӧ коммунальный сетьым идалыкын кеч-могай жапыштыже обслуживатлаш кўлеш. Еҥ-влак деч йодмаш кажне кечын пура. Эртыше арнян мутлан, 44 йодмаш лийын. Эн шукыжо – 21 йодмаш – вўд пуч дене кылдалтын лийын, 8-же – электроснабжений, 4-ше – вўд да 3-шо вентиляционный канал да пӧртвуй леведыш дене.

– Эртыше ийысе практике почеш ме палена, ырыктыме сезон тўҥалме дене ятыр йодмаш пура, – ойла Альберт Камидуллин. – Сандене ме кызыт пӧрт комитетын старшийышт дене пашам намиена, могай сомылым ышташ кўлмӧ нерген йодына. Аварий лийын кертме верлаште ончылгоч олмыктымо пашам эртарена. Чылашкыжат етшаш ок лий, кушто мо кўрылтмє нерген ончылгоч палаш ок лий вет. Туге гынат, ырыктыме сезон тўҥалме марте ме яра огына шинче, тыште да тушто пашам ыштена.

Коллектив ты кечылаште тыгак план почеш олмыктымо пашам шукта. Калтаса да Краснохолмский селалаште отмостко-влакым олмыктат, тошкалтыш клетке-влакым эрыктат. Калтаса селаште Горький уремыште пӧрт йыр отмосткым Альберт Биктимиров ден Андрей Байрашев уэмдат.

– Пӧрт йыр отмостко локтылалтмылан да тоштеммылан кӧра, вўд нӧрепыш йоген пура, – ойла пӧртын старшийже Магания Сабирьяновна Гайнцева. – «УЖХ» ООО деке йодмаш дене толын. Теве ты сомыллан тўҥалыныт, пашаеҥ-влак шке пашаштым сай шуктат. Мый нунын пашаштым текшырем.

Объектыш текшырымаш дене предприятийын инженержат толын кая. Айдар Нургалиев райрўдыштӧ да Краснохолмский селаште шуктымо пашам текшыра. Горький уремысе 15 номеран пӧртыштӧ ме тудым вашлийна.

«УЖХ» ООО Калтаса да Краснохолмский селалаште шуко пачеран пӧрт-влакым телылан ямдыла. Мемнан пачерлаште шокшо да волгыдо лиеш манын ўшанена.