Пагалыме ветеран деке икшыве-влак унала толыныт

1 №-ан Краснохолмский кыдалаш школын туныктышыжо да тунемшыже-влак Кугу Ачамланде сарын ветеранже, краевед, БАССР-ын сулло туныктышыжо, РФ калык просвещенийын отличникше, Яныш Ялкайн лўмеш премийын лауреатше, икымше школлан шке шўм-шокшыжым пуышо Алексей Семенович Исекеевым 95 ияш юбилейже дене саламлаш толыныт.

Алексей Семенович кеч илалше улеш гынат 6 А классыште тунемше-шамычым, туныктышо-влак Е.А. Мухтаровам, Н.Л. Вострецовам да библиотекарь И.А. Ивановам порын да шокшын вашлие. Тудо ўмбакыже кугешнен ончышо тунемше-влак деч вожылалынрак саламлымашым нале. Таче тудын деке кӧ унала толмым пален налмеке, тудо тыгерак каласыш: «Россий Президент В.В. Путин, республике вуйлатышын пашажым шуктен толшо Р.Ф. Хабиров деч саламлымаш-влакым налмеке, мый шке шочмо икымше школ деч саламлымашым чытыдымын вученам».

Тунемше-влак икымше школышто Алексей Семновичын историйым туныктымыжым да туныктымо паша шотышто директорын алмаштышыже лийын пашам ыштымыже дене палыме лийыныт. А эше тиде икымше школ кунам дыр Краснохолмский селаште икте гына лийын. Ту ийлаште тудым Иван Васильевич Васильев вуйлатен да тыште 1620 тунемше шинчымашым поген. Ветеранын ойлымашыж гыч ўдыр ден эрге-влак шуко оҥай информацийым пален налыныт. Тиде кажне совет тунемшылан октябренок да пионер лийме татым, йошкар-ал тўсан пионер галстукым кугешнен нумалмым, тылзе еда комсомол погынымашым, Ильич лўмеш озанлыкыште пайдале пашам. А икшыве-влак дене кушко гына коштын огыл! Тунемше-влак Москваш гына вич гана коштын толыныт, тыгак Волгоградыште, Санкт-Петербургышто лийыныт, Ростов областьыште Красновка станцийыште Совет Ушемын 13 геройжын подвигше ончылно вуйыштым савеныт, нунын кокла гыч иктыже – Тимиряй Кубакаевич Кубакаев, Тӧлдӧ ялын шочшыжо.

Алексей Семенович – икшыве-влакым патриотический шўлышыштӧ туныктышо лийын. Туге гынат тудо школ илыш дене интересоватлалтеш, вич кече тунемме, электрон журнал, ЕГЭ нерген чыла пала.

Чеверласашат жап толын шуо. Икшыве-влак Алексей Семеновичлан пеҥгыде тазалыкым, чулымлыкым тыланышт. Ветеран тунемше-влаклан пашам йӧратышан, келге шинчымашан лияш, а туныктышо-влаклан йоча-влакым йӧраташ тыланыш. Капкам петырыме годым «Тыште Кугу Ачамланде сарын ветеранже ила» возымо. Ме, туныктышо ден тунемше-влак, ты школышто тунемме да пашам ыштыме дене кугешнена. Вет тушто тыгай пагалыме еҥ – Алексей Семенович Исекеев пашам ыштен.

Н. Вострецова.