Чодырам ончаш кўлеш

Тудын цельже – чодыра-влакын санитар состоянийыштым саемдымаш, вес ийлан пожар лўдыкшӧ улмо сезонлан ямдылалтмаш, тыгак санитар правил ден пожар лўдыкшыдымлыкын йодмашыштым шуктен толмаш. Месячник жапыште могай мероприятий-влак эртаралтме нерген ме «Калтаса чодыра» АУ вуйлатышын алмаштышыже З. Сафиным каласкалаш йодна:

– Эн ончыч ме чодырам руымо деч вара кодшо пушеҥге, укш-влакым эрыктыме шотышто субботник-влакым эртарена.

Икманаш, кӧ чодырам руэн да шупшыктен гын, тудо шкеак тудын деч кодшыжым эрыктышаш. Ончыч кӧ кунам кертын, тунам эрыктен гын, кызыт чодырам руымо да шупшыктымо годым, вигак эрыктен кодыман. Тыгаяк паша районысо чодыралаште арендыш налме участкылаштат шукталтеш. Чодырам руымо деч кодшо материал тул лектын кертме лўдыкшым ышта. Кызыт ме нуным эрыктена, а лум вочмеке, йўлаташ тўҥалына.

Ялсовет территорийлаште шыжымсе экологий субботник-влакым эртараш – калык шуко коштмо верлам (каныме зона-влакым) шўкшак да коммуналь отход-влак деч эрыкташ тўҥалына. Тиде мероприятийыште ялсовет администраций, предприятий ден организаций-влакын коллективышт чулымын участвоватлаш тўҥалыт манын ўшаныме шуэш. Чодыралаште экологий обстановкым тазартыме шотышто мер организаций-влакат участвоватлен кертыт. Нуно чодырашке миен шўкшакым поген кертыт. Чодыраште кызыт пеш сӧрал, пушеҥге-влак шӧртньӧ вургемым чиен шогалыныт да йырваш яндар юж.

Акцийыште тыгак политический партий-влакат участвоватлен кертыт.

Тиде кечылаште самырык-влак дене пашам намийыше комитет да ийготыш шудымо икшыве-влакын «Центр» клубын волонтержо-влак дене пырля Сӧлеш ял шеҥгелне 0,5 гектарыште пушеҥгылам шындаш шонена. Тиде акцият месячник жапыште эрташ тўҥалеш.

Мый районысо калык деке йодмаш дене лекнем ыле. Чодырам ида шўклӧ, шўкшакдам тушко намиен ида кышке. Шкаланат вет шўкшак дене темше чодыра аланым, чодыра воктенысе посадкылам ончаш кумылло огыл. Эше шўкшак пожар лектын кертме лўдыкшым ышта.