Миграционный службылан – 300 ий

Миграционный службын кечыже але официально Россий МВД системын миграций йодыш-влак шотышто подразделений кече шке пайремжым кокымшо ий палемда. Тудым МВД министрын пунчалже почеш палемденыт. Тидлан кечымат арам огыл ойырен налыныт. 1719 ийыште 31 августышто (у стиль дене 11 сентябрьыште) Петр I Сенатлан «Вес элла гыч Санкт-Петербургыш Полицмейстрских паша Канцелярийыш запискылан толшо-влак нерген» пунчалыш кидым пыштен.

Пайремыш МВД-ын миграций йодыш-влак шотышто пӧлкан пашаеҥже-влак ветеранмытым чайым йўаш ўжыныт. Нуным РФ МВД-ын Калтаса районысо пӧлкажын вуйлатышыже Э.В. Ляпустин ты чапле кече дене шокшын саламлен. ™стел йыр погынышо ветеран-влак подразделенийыште ыштыме пашаштым, шке йолташышытым шарналтеныт.

– Мый паспорт ўстелыште, калык коклаште тудым тыге маныт ыле да кызытат тугак ойлат, 1982 ий майыште вуйлатыше лийын пашам ышташ тўҥальым, ойла Ильдар Хамитович Назмиев. – Сатаев Владимир Сатаевичын сулен налме канышыш кайымыж годым ты должностьыш тольым. Тудын деч ончыч Мархам Гилязев тыште тыршен. Сар деч вара паспорт пӧлкаште Петр Николаевич Батыров икмыняр жап тыршен. Варажым тудо районышто образований сферыште кугу кышам коден. Пӧлкаште служитлаш тўҥалмем годым кок пашаеҥ ыле – вуйлатыше да паспортистка. Паша ятыр лийын, туге гынат чылашкыжат етшаш тыршенна. Тунам ялсовет-влак дене сай паша кылымым ыштыме лийын. Ялсоветын секретарьже-влак шке паша ужашыштым ыштеныт, а ме шкенаным.

Ильдар Хамитович паспорт пӧлка вуйлатыше лийын, вара 2000 ий марте 18 ий паспортно-визовый службышто тыршен. Тудын тыршымыж годым Калтаса РОВД-ын паспортно-визовый подразделений республикыште МВД системыште эре эн сайлан шотлалтын, ведомствын Чап грамотыжо да Дипломжо-влак дене ятыр гана палемдалтын. Тыгак Ильдар Хамитовичымат чапландареныт. Милицийыште служитлымыж годым Назмиев документ ден паспорт-влакым оформитлыме, граждан-влакым регистрироватлыме пашам гына огыл шуктен, тудо тыгак правам аралыше орган-влак дене пырля оперативный нарядыш лектын, пӧлкаште дежуритлен. Осал пашам ыштыше-влак ваштарешат кучедалын. Служебный пашам шуктымаште сусыргымыжлан кумшо группа инвалид улеш.

Правам аралыме органыште службо подразделенийын ветеранже Алексей Михайлович Раяновлан поснак илышыжлан да тазалыкшылан лўдыкшӧ лийын. 1996-1997 ийлаште тудо Россий Вооруженный вийыште Чечен республикыште контракт почеш служитлен. Вара 1997 гыч 2000 ий марте Калтаса РОВД-ын медвытрезвительыште дежурный инспектор да участковый уполномоченный лийын пашам ыштен. 2000 ийыште пӧлкан паспортно-визовый службыжым вуйлаташ тўҥалын. 2006 ийыште МВД-ын ты подразделенийыштыже эше ик посна ведомствым – Федераль миграционный службым ыштеныт. Алексей Михайлович Россий УФМС-ын Калтаса районысо пӧлкажым вуйлаташ тўҥалын. 1997 гыч 2006 ий марте МВД пӧлкаште служитлымыж годым Раянов Чечен республикыште эше кум гана лийын, верысе правам аралыше орган-влаклан общественный порядкым арален да террористический организаций-влак ваштареш кучедалын. Тудо Россий МВД-ын «За отличие в охране общественного порядка», «200 лет МВД России», «За боевое содружество», «Участнику контртеррористической операции на Кавказе» медаль, Россий ФМС-ын 2-шо степенян «За службу» медаль дене палемдалтын. Тудын оҥжым тыгак «Ветеран боевых действий», «За отличие в службе», «Участник боевых действий», «За верность долгу», «За службу на Кавказе», «За службу России», «Почетный сотрудник МВД по Республике Башкортостан» знак-влак сєрастарат.

2016 ий гыч миграционный служба подразделенийым ФМС-ым шалатымеке, МВД-ыш кусарат. Кызыт тиде пӧлка миграций йодыш-влак шотышто манылтеш.

– Шке историйыштыже тиде служба шуко гана вашталтын, шалаталтын, туге гынат тудын пашаже Петр I жапысе гаяк лийын кодеш, – ойла РФ МВД-ын Калтаса районысо пӧлкажын вуйлатышыже Эрнест Владимирович Ляпустин. – Тиде шкенан да йот элла гыч толшо граждан-влакым регистрационный учетыш шогалтымаш, миграционный пашам текшырымаш, паспорт ден виза-влакым оформитлымаш. Рашрак каласаш гын – элнан лўдыкшыдымӧ ыштымаш. Сандене миграционный службын пашаже кугыжанышлан моткоч кўлешан.

Таче РФ МВД-ын Калтаса районысо пӧлкажын миграционный йодыш-влак шотышто пӧлкаште ныл еҥ пашам ышта. Службым Александр Витальевич Сайгин вуйлата, Анастасия Сокова ден Альбина Корягина инспектор лийын тыршат, а специалист-эксперт – Наиля Ямурова. Мут толмашеш, Наиля Файрушевна коллективыште эн уста улеш. Тудо ты службышто 1993 ий гыч тырша. Россий ФМС-ын 2-шо степенян «За службу» медаль дене палемдалтын.

– Пӧлкан коллективше келшен тырша, специалист-влак сай ямдылалтыныт, ушан-шотан улыт, – ойла Эрнест Владимирович. – Миграций йодыш-влак шотышто кугыжаныш услугым ончыктымо пашаштым кўкшын аклем.

Миграционный службын пашажым чыланат огыл сай палат. Но ме шке илышыштына тышке эше икмыняр гана толына. Тудын пашаеҥже-влак мыланна ик эн кўлешан документым – паспортым пуат. Самырык-влак нерген каласен ом керт, а ме, СССР-ыште шочын-кушшо-влак, тудым моткоч кўкшын аклена, тудын дене кугешнена.