Кажне кечын кочкын, уто нелытым кудалте!

Кап нелытым кудалташ манын, мом кочмым эскераш да калорийым шотлаш веле огыл, эше продуктын могай качестван улмыжым шотыш налман. Ик продуктын пагарыште весе дене ушалтмыж дене организмыште вещества алмашталтмаш эркышна гын, весе ты пашам эшеат саемден да писемден кертеш. Продуктышто улшо пайдале вещества, витамин икте-весыштлан тўрлӧ влиянийым ыштат. Садлан южыжо пырля кочкаш лийме укем але пешыжак огыл келшен толдымо кочкышым шулыктарымаште нелылыкым луктын кертеш. Чын да нелытым кудалташ полшышо рационышто лачшымак могай кочкыш лийшаш? Уто нелытым погаш огыл манын, тўрлӧ продуктым кузе келыштарен кочман?

Шыл ден шем пурыс. Шыл – организмым белок дене пойдарен кертше ик эн тўҥ кочкыш, организмым «чоҥышо» ик эн кўлешан материал. Тўрлӧ йӧрым ешарен кочмо тудын тамжым саемда веле огыл, эше пайдалым ышта. Пурыс метаболизм процессым писемда, коя ден углевод балансым нормыш кондаш полша. Поснак ты йєрым спорт дене пеҥгыде кылым кучышо да коя йӧршан вольык шылым, белокан продуктым шуко кочшылан рационышкыжо ешараш темлат.

Шӧр ден куркума. Ты йўышым эше «шӧртньӧ шӧр» маныт. Тиде йўыш – протеин коктейльлан сай алмаштыш. Тудым тыгай нормо дене ямдылат: 100 мл вўдыш 40 г куркумам ешарат. Нугыдо пастыш савырнымешкыже, вартышым чарныде луген шолаш пуртат. Куркумин организмыште окислений процессым кораҥда. Спорт дене кылым кучышылан тыге каҥгешташ ок пу. Ик кугу пане куркумаште 16 процент кўртньын, 26 процент марганецын суткаш нормышт уло.

Муно ден шере пурыс. Белокан кеч-могай кочкышым пакчасаска йӧре эрдене кочкаш гын, неле углеводан продукт дене таҥастарымаште организмлан палынак кугу пайдам ышта. Тыгай продуктым кочшо еҥ кужу жап ок шужо. Салмамуным эрдене кочкын, кечаш калорийым 18 процентлан иземдаш лиеш. А ты рационыш эше С витаминлан поян шере пурысым ешараш гын, организмыште уто коям пытараш полша.

Грейпфрут ден кол. Кочмо деч 15 минут ончыч фруктын пел ужашыжым але пел стакан сокшым йўаш кўлеш. Тыге тўҥ продуктын кугытшо ончычсо гаяк кодеш гынат, калорий шагалеммылан кӧра кап нелыт палынак туртеш. Шыл олмеш колым кочкаш пайдале. Белок деч посна ты кочкышышто В12 витамин уло. Тудо уто нелытым писын кудалташ полша.