Лектышым пасушто огыт кодо

Технологий ден технике саемдалтеш, туге гынат ялозанлык производитель-влакын пашашт игечын могай улмыж деч шога. Кызытсе сезоным ончалаш гын, лач ты сўретым ужаш лиеш.

«ИТС-Агро» ООО-што 2 тўжемат 100 гектарыште пырчан культура-влакым шындыме лийын. Тачысе кечылан 1420 гектар гыч пырчым погымо. Эше 680 гектарыше поген пытараш кўлеш.

– Пырчан культура-влакым – уржам, тритикалем, кокияш да икияш культура-влакым, шожым ме поген пытарышна, – ойла озанлыкын агрономжо да пашажым виктарышыже Анастасия Волкова. – Пурса дене йодыш неле. Жапыштыже солен шуктен огынал. Кызыт Тошто Кудаш участке гыч кок самоходный «Мегдон» косилкым конденна. Солена, комбайн-влакым валок-влакым погашлан уэш переоборудоватленна. Кече ончалеш гын, пурсамат погена, но тудым ятыр йомдарена, коеш.

Озанлыкыште ныл «Акрос» у комбайн уло. Тыгай вий дене ныл кечыште чыла кодшо киндым поген налаш лиеш. Комбайн-влак дене ачаж ден эргыже Агаповмыт – Александр Николаевич ден Сергей, тыгак Артем Ахметьянов, Жора Никсонов – тыршат. Нуно чыланат опытан улыт. Тугеже, кинде пасушто ок код.

Озанлыкыште кодший пырчым коштышо да эрыктыше агрегатым погымо. Тений тудо моткоч кўлешан лие. Пасула гыч пурышо чыла пырчым тудын гоч колтат. Тошто Кудаш гыч Братовщиныш пырчым кошташ шупшыктат. Тушто кызыт производственный объект-влакым чоҥаш гына тўҥалыныт. Пырчым коштымо агрегат дене Михаил Алексеев тырша.

Тений шошым озанлыкыште тўҥ шотышто элитный пырчым ўдымӧ. А шурно лектыш пеш сай огыл. Ончылгоч шотлымаште гектар гыч 18 центнер дене. Элитный пырчылан тиде шагал.

– Нулевой технологий кучылтмым чарнена докан, угыч куралаш тўҥалман, – ойла Анастасия Волкова.

Кокияшым тений тыште нулевой технологий почеш ышна ўдӧ, куралмым диск дене обрабатыватлышна. 460 гектарыште тритикалем да 50 гектарыште уржам ўдышна. Класс-Аксион трактор дене Сергей Агапов ўдыш.