Пытартыш гектарлаште

– Кок кечылан паша кодын, – ойлен кодшо вўргечын мыланна «Восход» СХК-н тўҥ агрономжо Егор Зайнетдинов. – Вара ме уржа-сорлам пытаренна манын каласен кертына. Пурсам 20 гектарыште да шыдаҥым 110 гектарыште погышаш кодын. Тиде кечын игече изиш йўштырак гынат, сай, кечан ыле. Комбайн-влак пасушто лийыныт. А изарнян эр гыч тўҥалын кас марте йўр йўрӧ. Адакат паша шеҥгеке шўкалалте. «Восход» СХК-те веле огыл, районысо моло озанлык пасулаштат паша чарнен шогале.

«Восход» СХК-те пырчан культурым 2300 гектарыште ўдымӧ лийын. Кинде лектышат куандарен – гектар гыч 25 центнер дене налме. Тыште чыла культурымат – уржам, пурсам, шожым, шыдаҥым – ўдымӧ лийын. Тиде озанлыкыште кажне ийын кинде лектыш сай, арамлан огыл нуно районысо озанлык-влак коклаште эртарыме паша таҥасымаште эре ончыл верым налыт але призер-влак радамыште улыт. Теният тыгак миен лектын.

Озанлыкыште киндым погаш кум комбайн – кок «Акрос» да «Палесье» уло. Киндым «Кейс» самоходный косилке дене солымо. Моло ийлаште шке комбайн денак погена ыле, тений гын, Дєртєльє МТС деч «Нью Холанд» комбайным йодаш вереште.

Киндым погымаште комбайнер-влак Алик Яндимиров, Валерий Байдимиров, Вячеслав Иманов тыршен пашам ыштат. Комбайн-влак йымач пырчым «КамАЗ» дене Сергей Камалов, кугу грузан автомашина-влак дене Игорь Баймурзин ден Алексей Ильчибаев шупшыктат.

Игече йўранлан кӧра кокияшымат ўдаш неле. Лач 100 гектарыыште гына шыдаҥым ўденна, а ўдаш шукырак шоненна ыле.

– Куралаш яра пасу уке ыле, – ойла Егор Зайнетдинов. – Ме августын кокымшо декадыштыже гына киндым погаш тўҥална. Вара яра пасушто кокияш шыдаҥым ўдышна.

Кызыт озанлыкыште кылмаш куралме пашат мия. Тиде пашалан озанлыкыште кугу тўткышым ойыреныт да кызытат ойырат.

– Шукияш практике ончыкта, мемнан мландыште шыжым курал от кодо гын, ончыкжым сай лектышым налме нерген монден кертат, – шуя шке мутшым умбакыже Егор Камитдинович. – Сандене ме кажне ийын чыла пасум кылмаш куралаш тыршена. Результат могай – кинде лектыш гыч ужаш лиеш.

Тиде кечылан озанлыкыште 1200 гектар пасум куралме. Тиде пелыж деч шукырак. Пасум куралмаште Т-150 кум трактор да шукерте огыл озанлык кугу куатан «Бюллер» тракторым налын – тыршат. Трактор-влак дене пасум Юрий Изибаев, Александр Байдимиров, Венер Шакиров да Николай Исашев куралыт.