Все новости
Новости
25 Сентябрьыште 2019, 12:22

Чесноклан верым ямдылыман

ОКТЯБРЬЫШТЕ шындышаш чесноклан верым ончылгоч ямдылыман.

Отызан культурым, ковыштам, пареҥгым, киярым, томатым шындыме верыште чеснок шолдыра лиеш, но тушто йўр вўд шинчышаш огыл.
Йыраҥ ярсен шуын, ўден кодаш гын, сентябрь мучаш марте пурса, немычпурса, турек пурса чапле сидерат лийын шуыт. Но тидлан йыраҥысе шукияш шўкшудым: йолваншудым (пырей), пўтыралтышшудым – тўрыс кораҥдыман. Уке гын шуйналтше шўкшакан да сидератан мландым кольмо дене савырал пышташ йӧсӧ лиеш.
Йыраҥым кўнчымӧ деч ончыч 1 ведра компостым але пургыж рокым шаваш лиеш. Тышкак (1 кв. м кумдыклан) 1 кугу пане дене суперфосфат ден натрий сульфатым ешараш кўлеш. Кукшын чучеш гын, чеснокым шындыме деч 1-2 кече ончыч йыраҥыш вўдым шавашат лиеш. Рокышто илыше пайдале микрофлор вўдыжгӧ мландыште ок кылме, шўкшудо нӧшмат лектын шукта. Нӧргӧ шўкшудым лекмыж еда вигак кораҥдаш гын, вес ийын шошым шўкшудо шагал лиеш.
Лукмо лектышым шотыш конден шуктымеке, эн таза да шолдыра чеснокым йыраҥ гыч вигак шындаш ойырен кодыман. Чеснок пуч мучашеш кушшо чеснок пўй (бульбочко) кокла гыч эн шолдыражым посна вес йыраҥыш шындаш лиеш. Тыгай нӧшмӧ гыч вес ийлан икияш чеснок кушкын шуэш.