Йодмаш кугу да акшат келшыше

«Октябрь» кинотеатр площадь ончылно ялозанлык кооператив, частный предприниматель, фермер да посна сурт озанлык-влакын сатушт дене торгайыме радам-влак верланеныт ыле. Шке сатуштым ола калыклан калтасамытат темленыт. Ярмингашке мемнан район гыч 14 автомобиль каен.

Тыште телылан витаминым ситышын жапашлен кодаш лиеш ыле – могай гына пакчасаска лийын огыл. Акшат шерге огыл ыле. Ярмингаште калтасамыт 6,5 тонн пареҥгым, 900 килограмм кешырым, 630 килограмм йошкарушменым, 400 килограмм ковыштам, 200 килограмм шоганым да 150 килограмм чеснокым ужаленыт. Мўйлан йодмаш кугу ыле. Ярмингаште ик тонн тиде шере да пайдале кочкышым ужалыме.

Вес ярминга Нефтекамск олаште 11 октябрьыште эрташ тўҥалеш.