Арбуз нӧшмӧ

Арбуз нӧшмыштӧ шўм чер деч аралыше аминокислота-влак улыт. Нуно давленийым нормышто кучаш полшат.

Ик кормыж арбуз нӧшмыш 1 литр вўдым темыза, 45 минут шинчыктыза. Вўрысӧ шекарым нормышто кучаш кўлмӧ годым ностойым кече мучко изин-изин йўза.

Арбуз нӧшмӧ ўпланат моткоч пайдале. Арбуз ўйым, мутлан, кокос йў дене вараш да вуйыш йыгаш гын, ўп кўрышталтмым чарна.

Шекшым лукташ, давленийым волташ кўлмӧ годым коштымо арбуз шўм ден нӧшмым порошок гай лиймеш йоҥыштыза да тиде вартышым кечеш 2 гана 1/2 десерт пане дене кочса. Ты йӧн дене 30 кече эмлалтса.

Кугезе коча-кована-влак арбуз нӧшмӧ полшымо дене сӧсаным луктынат. Кушкыл нӧшмым коҥгаште але духовкышто коштыза, вара ложаш гай лиймеш йоҥыштыза. 1 ужаш арбуз нӧшмӧ ложашым 10 ужаш шӧр дене йєрыза да 2 арня жапыште кечыште 2 стакан дене йўза.

Арбуз нӧшмӧ отвар вергышке але шондыгалташке кў погынымо деч сайын полша. Тудо тыгак мочеполовой системын черже деч арала. Йоҥгытыш 1 л вўдым темыза, тышкак 4 кугу пане арбуз нӧшмым ешарыза. Шолаш пуртыза да йўкшымыжым вучалтыза. Кечеш 2-3 гана 1 стакан дене йўза.

Пектинлан поян арбуз нӧшмӧ организм гыч неле металлым, пестицидым луктеш, радиоизлученийым луштара.

Арбуз нӧшмым кочмо годым вўрысӧ осал холестерин шагалемеш. Отвар шоло ден мокшлан пайдале.

Арбуз нӧшмым мўшкыран ўдырамаш, уто нелыт дене орланыше-влаклан кочкаш огеш лий.