Машина денат, трактор денат коштеш

Шке паша корныжым Биктимиров Рудик 1991 ийыште, армий радам гыч толмеке, «За коммунизм» колхозышто тўҥалын. Тудын водительын праваже лийын, армий деч ончыч профтехучилищым тунем лектын. Самырык да салтак корным эртыше рвезылан озанлыкыште вигак грузовой автомобильым ўшанен пуэныт. Тудо чыла кўштымӧ пашам жапыштыже шуктен.

Тиддеч вара ятыр жап эртен. 90-шо ийлаште «За коммунизм» колхоз «Колос» СХПК-ке савырнен. Тудынат илышыже кужу лийын огыл, панкрутыш лектын. Рудик Петрович ончычсо колхозник семын колхоз шаланымылан ойгырен. Вет пашат, пашадарат, ешын илышыжат тиде озанлык дене кылдалтын лийын. Да иканаште чылажат шаланен…

Но Юмылан тау, Кєкыш ялыште чулым хозяйственник толын лектын.

Герман Афанасьевич Биктимиров панкрутыш лекше колхозын ончычсо мландыже да производственный объектше-влакым налын шкенжын кресаньык-фермер озанлыкшым почын. Рудик Петрович уло кумылын тудлан полшаш лийын.

Биктимиров Рудикым мый шукерте огыл пасушто вашлийым да войзышым. Тыште механизатор-влак уржам ўдат ыле. Рудик Петрович ГАЗ-53 автомашина дене ўдымӧ агрегат деке пырчым шупшыктен. Уржа-сорлаштат тений Биктимиров сайын тыршен. Автомашинаже кеч тошто гынат, тудым 1988 ийыште ыштен лукмо, мастар кидыште сайын ышта.

– Техникым ончен, олмыктен шогаш кўлеш, – ойла Рудик Петрович. – Тунам тудо лу ийла дене ышташ тўҥалеш.

Герман Афанасьевичын озанлыкыште Биктимиров кеҥежым трактор денат тыршен. Тудо МТЗ-82 трактор дене сенажым шупшыктен. Икманаш, кумда профилян механизатор.

Тыгак Рудик Биктимиров сай пелаш, ача да коча улеш. Снежана ватыж дене вич икшывым ончен куштат. Кугырак эргышт-влак Владислав ден Артем шкат пашам ыштат – вахте йӧн дене. Анастасия повар-кондитерлан тунемеш. Ксения нылымше классыште, Кирилл тений икымше классыш каен.

Нунын озанлыкыштат кугу: ушкал, сӧсна, шорык-влак. 20 сотык пакча, тыште нуно тўрлӧ пакчасаскам ончен куштат. Ача-ава шкат пашам тыршен ыштат да тидлан икшывышт-влакымат туныктат.