Мокшымат, вўрымат эрыкта

Айдеме, тазалыкым лунчыртышо кочкышым кочкын, тамакым шупшын да аракам йўын, тудым пел курым жапыштак пытара. Чыла тидым шотыш налын, мокшым эрыктыме сай йӧным темлена. Тудын пайдаже кок кече гычак шижалтеш. Тылеч посна шўм-вўргорно системын шуко черже деч арала.

Изюм отвар организмыште биохимический процессым чолгаҥда, вўр ден мокшым токсин деч эрыкта. Коштымо изюмым сайын ойырен налаш кўлеш: натуральныйракше, шемалгыракше, яндарракше, чын форманже, утыждене пеҥгыде, утыждене пушкыдо огылжо пайдалыраклан шотлалтеш. Изюм йылгыжеш гын, палыза: тудым специальный растворышто кучымо! Пайдале отварым кастене ямдылыман. 150 г изюмым сайын мушман да 2 стакан шолшо вўдыш пыштыман. Вартышым 20 минут шолтыман. Тулым йӧртыман. Эрдене отварым шўрыман да изишак ырыктыман. Тудым шуженеш йўман. Тылеч вара пел шагат гыч веле кочман. Отвар деч кодшо изюмыш шўльӧ пучымышым ешараш гын, моткоч пайдале эр кочкыш лектеш. Мокшым эрыктыме процедур сайынрак полшыжо манын, менюшко йошкарушменым, кешырым, олмам, ковыштам, топинамбурым, шпинатым, черносливым ешарыман. Тыгодым эше шєр кочкышым шагалемдаш пайдале. Изюм отварым тылзеш 4 гана веле йўаш гынат, мокш моткоч «таушта».