Пиалан ава: кӧ тудо?

Тудын организаторжо – Калтаса районысо еш служба – икымше вашлиймашым Краснохолмский селаште эртареныт да «Пиалан ава» манын лўмденыт.

«Шонанпыл» йоча усталык пӧртыштӧ Краснохолмский селаште да пошкудо яллаште илыше, поснак ойыртемалтше икшыве-влакым ончен куштышо ава-влакым ўжыныт. Нунылан кугу программым ямдылыме лийын. Тышке мастер-класс, ўдырымаш да еш тазалык нерген лекцийым, социаль полышым ончыктымо нерген информацийым ямдылыме лийын, а «Шонанпыл» пӧртын воспитанникше-влак чапле концертым ончыктеныт.

– Ме ава-влакым кеч изиш гына сурт сомылка деч каналтыш да шкеныштым пиалан ўдырамаш семын шижышт манын ик верыште чумыраш лийна. Вет нунылан уло мо нерген кутыраш, – каласен еш служба вуйлатыше С.М. Хамидуллина.

Чынжымак, мастер-класс деч вара, а тудым Елена Андуганова ден Светлана Раянова – макияж ден визаж, Наталья Чигвинцева – маникюр, Лилия Нурисламова – косметический массаж, Анна Егорова – шугаринг, Айгуль Хаматханова – эрвел куштымаш, ўдырымаш-влак вашталтыныт. «Мый таче шкаланем икымше гана маникюрым ыштышым», – каласыш ик ава. Лилия Ильясова икшыве-влак дене курчакым да слаймым ышташ туныктен. Тыгак Янаул ола гыч психолог Ляйсан Юнусован эртарыме занятийже пеш оҥай да пайдале лийын.

«Деловая гостиная» – тыште ўдырымаш пиал да мо тугай пиалан ава лияш темым каҥашеныт. Шке шонымашышт, илыш опытышт нерген Краснохолмский селасе ўдырымашмыт каҥаш вуйлатыше Л.А. Васильева, Калтаса рўдє эмлымверын врач-терапевтше, райрўдӧ ўдырамашмыт каҥаш вуйлатыше М.Р. Насибуллина, районысо ўдырымаш-влак каҥаш вуйлатыше З.В. Максимова, образований пӧлка вуйлатыше Э.Р, Гарипова, «Шонанпыл» йоча усталык пӧртын туныктышыжо да шуко икшыван ава Л.А. Данилова, районысо ача-влак каҥаш вуйлатыше А.А. Тимиргалиев ойленыт.

«Деловая гостинаян» кокымшо ужашыже прозаический, тидын годым оҥай да пайдале лийын. Тыште Калтаса селасе рўдє эмлымверын врачше-влак И.З. Бадретдинова да А.М. Зиязова еш да ўдырымаш тазалык нерген каласкаленыт. Еш службын пашаже нерген тиде социаль организацийын вуйлатышыже С.М. Хамидуллина ойлыш.

Светлана Мавлявиевна палемдыш, ыштыме еш клуб чўчкыдын пашам ышташ тўҥалеш. Опекун, приемный да шуко икшыван еш-влак дене вашлиялташ палемдалтеш.

Еш у клубым презентоватлаш «Шонанапыл» йоча усталык пӧрт полшыш, а предприниматель-влак И.Н. Хатмуллина («Хороший» кевыт) да Р.И. Тагирова («Игрики» кевыт» спонсор полышым ончыктышт. Нунылан ты вашлиймашын организаторжо-влак деч шўм гыч лекше кугу таум каласат.

Серафима Канданова, инвалид икшывын аваже:

– Мый,поснак ойыртемалтше икшывын аваже улам, мыйын Элеонора ўдыремлан 16 ий, тудо нелын черле,мӧҥгыштӧ 8-ше классыште тунемеш. Мемнан деке коррекционный школ гыч туныктышо толеш, ме чыла предметым тунемына. Элеонора занятий-влакым йӧрата, туныктышын толмыжым вуча. Тылеч посна ме ўдырем дене пырля Краснохолмский селаше эртыше чыла пайремын, мероприятийыш, концертыш коштына. Ме чыла цирковой представленийым онченна, Уфа олашке чўчкыдын миен толына. Элеонора ик гана веле огыл самырык театрыште, Руш драмтеатрыште, планетарийыште лийын. Чыла тидым мыланна куштылго огыл ышташ, а ўдырем верч мый чыла нелылыкым сеҥен кертам. Ме эше тўрлӧ конкурслаште участвоватлена. Районысо У ий открытке конкурсышто тудо икымше верым налын, тений ме кум кугу наградым нална: Ульяновск олаште инвалид икшыве-влаклан всероссийский конкурсышто «Почеламут-влакым лудына» номинацийыште сеҥышна, «Герой-влаклан чап» фоторамке пашаже Москвасе конкурсын 2-шо степенян лауреатше диплом дене палемдалтын, тыгак «Мустай Каримым палем» республикысе лудшо-влак конкурсышто участвоватлен. Теве тыге ме илена, нелылыкым сеҥена, шонена, ме пиалан улына.