Сеҥымашан лияш тыланымаш икшыт ушен

Нуно кудло ийым эрталше улыт, туге гынат тиде кечын спортын вич видше дене шке моштымашыштым ончыкташ ямде лийыныт. Тений илалше еҥ-влак коклаште поро йўлашке пурышо спорт фестиваль чолга да сеҥымашан лийше 78 еҥым иктыш ушен. Армреслинг, дартс, баскетбол корзинкыш топым кышкымаш, куржталмаш, ўстембал теннис – теве таҥасымашын тўҥ дисциплиныже. Шахмат-шашке турнир посна, арня ончыч эртен.

Теве сеҥымаш кумыл дене фестивальын участникше-влак райрўдыш толыныт. Кӧ тиде мероприятийыште икымше гана участвоватлен, тыште тудлан чыла у лийын. А кӧ ий еда фестивальыш толеш, кузе самырык-влак ойлат, нуно тыште «верысе» улыт. Нуно кушто таҥасымашын кушто эртымыжым сай палат. Кузе ойлат, ийгот спорт дене кылым кучаш огеш мешае, а мӧҥгешла, ончыко каяш, илаш, награде-влакым налаш тарата. Ты кечынат чыла тидым ужаш лийын. Кӧ-дыр мӧҥгышкыжӧ икмыняр наградым наҥгаен. Тыште Яндимиров Петр Петрович ден Аксенов Геннадий Васильевичым палемдаш кўлеш. Нунын копилкышт кок медальлан шукемын. Ӱдырамаш-влак коклаштат тыгайышт лийыныт. Тиде Галякбарова Лилия Искандаровна (армреслингыште – кумшо вер да дартс – икымше), Изибаева Лилия Искандаровна (куржмаште – икымше вер да армреслингыште – кокымшо) да Данилова Мария Петровна (топым кышкымаште – кокымшо вер да куржмаште – кумшо).

– Мыланем таҥасымаш пеш оҥайын эртыш, – ойла Амчемучаш ял гыч Глухова Евдокия Иксановна, тудо фестивальыш икымше гана толын. – Топым корзиныш, дротикым кышкышым. Призан верлаш шым логал гынат, самырык годсо жапемым шарналтышым. Шкемым ончыктышым, моло-влакым модмыштым шымлышым. Шушаш ийынат толаш тыланымашем уло.

Ятыр илалше еҥ фестивальым кутыраш толеш. Тыште нуно пашам пырля ыштыме йолташышт дене вашлиялтыт, ожсо жапым шарналтат. Коча ден кова-влакым ончетат, чонет куана. Вет акрет годсо поро мут-влак улыт: ийготым тудым илен эртарыме ий дене огыт шотло, а шўм-чонын состоянийжым ончат. Тиде тыгак. Тиде чолга илалше еҥ-влакым ончалатат, умылет, нуно шке илышыштым арам огыт эртаре. Кызытсе илыш дене тӧр ошкылаш тыршат. Теве Амчемучаш ял гыч Ефросинья Петровна Иванова пеш весела да чулым кова улеш. Челночный куржмаште туге куржын эртыш… А вет тудлан кудло ий огыл. Таҥасымашын уловийже дене тудлан палемдыме уштышым кум гана гына куржын эртыман лийын, а Ефросинья Петровна чымалтеш веле, тудым вара судья-влак гына чарышт.

Тиде кечын коча ден кова-влакын Чап грамота да медаль-влак дене палемдышт. Ме нуным шокшын саламлена.