Ветеран-влакым чапландареныт

Ветеран-влакым чеслымаш кугу пайрем концерт дене мучашлалтын. Тудыжо районысо Культура пӧртыштӧ эртен. Погынышо калык деке район администраций вуйлатыше Ю.М. Садыров саламмут дене лектын. Юрий Минзарипович ветеранмытым шокшын саламлен да нунылан пеҥгыде тазалыкым, кужу ўмырым тыланен. Вет лач нуно мемнан районым вияҥдымашке кугу надырым пыштеныт, сандене ме нуным пагалышаш да жаплышаш улына. Юрий Минзарипович пайрем шўлышыштӧ район администраций деч мер илышыште чолган участвоватлыше ветеран-влаклан Тауштымо серыш-влакым кучыктен. Тиде – Матвей Абдуллинович Абдуллин, Геннадий Васильевич Аксенов, Петр Николаевич Батыров, Любовь Николаевна Апсаликова, Василий Иликбаевич Иликбаев, Николай Байтимирович Байтимиров.

Районысо ветеранмыт ушемын вуйлатышыже Евгений Иликбаевич Ильчигулов «Дети войны» медаль дене Василий Иликбаевич Иликбаев ден Виктор Алексеевич Ивановым награждатлыме нерген увертарен. Медальым нунылан район администраций вуйлатыше кучыктен.

Ветеран-влакым пайрем дене тыгак мемнан газетын редакторжо Виталий Аксяевич Акиеват саламлыш. Тудо район газетын активный пропагандистше-влаклан Тауштыме гармота ден верысе автор-влакын книгаштым кучыктен.

Пайрем концертыште районнан тўрлӧ яллаже гыч самодеятельный коллектив ден мурызо-влак выступатленыт. Ончаш толшо калык «Встреча» ветерамытын калык хорлан, Кӧтерем села гыч «Криница» ансамбльлан, «Рвезе кумыл» гармонист-влак ансамбльлан, Изи Качак ял гыч «Зардон» ансамбльлан, мурызо-влак Арсентий Иргибаевлан, Ирина Карасевалан, Светлана Арслановалан, Соня Минабашевалан совым рўж кырен. Кок у мурым калыклан шке мурыжым мурышо автор Генадий Тимеряев пӧлеклен.