Лўдде, кугешнен нуно армий радамыш каят

1 октябрь гыч Калтаса районышто, тыгак элна мучко, шыжымсе призыв тўҥалын. Россий президент Владимир Путинын пунчалже почеш, октябрь гыч декабрь тылзе марте 130 тўжем утла рвезым военный службыш налыт. Нунын кокла гыч 42 рвезе мемнан район гыч. Призыв комиссийыш тиде гана 157 рвезым гына кўштымӧ. Тудо ныл кече пашам ыштен.

Калтаса районысо рўдӧ эмлымверыште эр гыч тўҥалын кас марте еҥ шуко лийын, тўҥ шотышто тиде салтак радамыш кайыше рвезе-влак. Ончыч нуно медтекшырымашым эртеныт, вара призыв комиссийын пунчалжым вученыт. Тудыжо эмлымверын погынымаш-влак залыштыже верланен улмаш.

Тудын составышкыже правам аралыше орган, калыклан пашаверым ситарен шогышо рўдер, образований пӧлка, медицина да военный комиссариатын пашаеҥже-влак пуреныт ыле.

Призыв комиссийын пашам тўҥалмыж деч ончыч Янаул ола, Янаул да Калтаса районысо военный комиссариат граждан-влакым армий радамыш ямдылыме да призыв пєлкан вуйлатышыже Шайдуллин Данил Хамидович эмлымвер пашаеҥ-влак ончылно выступатлен. Тудо врач-влак деч кўлеш пунчалым лукмо годым пеш тўткӧ лияш йодын.

– Тиде этапыште ме юридический да медицинский чын пунчалым лукшаш улына, умбакыже мемнан рвезына-влакым Уфа оласе сборный пункт гыч мӧҥгеш савырен ынышт колто, – каласен Данил Хамидович. – Призывник тазалыкше дене службылан огеш йӧрӧ гын, а врач тудым, содыки, йӧршылан шотлен, но тудым Уфасе сборный пункт гыч мӧҥгеш колтат гын, тыгодым призывниклан мӧҥгӧ пӧртылашыже оксам йоҥылышым ыштыше врач тўлаш тўҥалеш. Конешне, эн ончыч ончат, врач чынак йоҥылышым колтен але уке. Калтаса районышто тыгай случай ок лий манын мый шонем.

Ушештарена, тений шошым мемнан район гыч 56 призывникым салтак радамыш налме. Кеч план почеш 48 рвезым гына колтышаш лийыныт. Шыжымат тиде планым темена манын ўшаныме шуэш. Вет кызыт шуко призывник умыла – военный билет пеш кўлешан документ.

Калтаса села гыч Булатов Марсель Расулевич тений Уфа оласе авиационный технический университетын кокымшо курсыжым тунем лектын да военный службым эрташ манын, ик ийлан академический отпускым налын. Комиссийын кокымшо кечыжлан тудлан «армийлан йӧрет» манын каласеныт.

– Мый служитлаш шонем, – каласкала мыланна Марсель. – Кызыт але тунем лекме деч вара. Мыйын шонымаште ойыртем уке. Айдеме салтак службылан йӧрышӧ улеш гын, служитлышаш. Ик ий служитлен пӧртылам, вара адакат тунемаш тўҥалам. Пашашке военный билет деч посна пураш моткоч йӧсӧ. Армий, мемнам, самырык еҥ-влакым, илышлан туныкта.

Чынжым каласаш гын, ме тыгай вашмутым вученат огынал. Вет шуко рвезын армий радамыш каяш кумылжо уке. Тыге огыл улмаш. Тиде патриотизмлан пример. Кунам мемнан рвезына-влак салтак радамыш лўдде, но кугешнен каят, чонланак сай.