Поро пашам ышта да куаным пӧлекла

Шочмо Келтей ялыштыже кандашияш школым тунем лекмыж деч вара тудо вигак туныктышо лияш шонен пыштен да Марий кугыжаныш педагогика институтыш тунемаш пурен. Тудын чыла пашаже – у прием ден технологий-влакым кычалмаш. Изи икшыве-влакым возаш, лудаш, шотлаш, книгам йӧраташ туныкташлан ятыр вий кўлеш. «Нунын сай шижмашыштым почын мошташ гын, – ойла Зоя Исинбаевна – нуно илышлан куанен илаш тўҥалыт. Тыгак нуно пўртўсым, Шочмо элым йӧраташ тўҥалыт». Школ паша деч посна тудо тыгак ятыр ий участковый сайлымаш комиссийыште секретарь улеш, иктешлымаш кугыжаныш аттестацийыште участвоватла. Школышто да ялыште эртарыме ятыр мероприятийын участникше улеш.

Пашам пырля ыштыме йолташнан ўдыржат аважын кышаже почеш каен. Юлия Леонидовна отличий дене педагогика колледжым тунем лектын. Вара, паша деч кўрылтде, М. Акмулла лўмеш Башкир кугыжаныш университетым. Кызыт Нефтекамск оласе ик йочасадыште тырша.

12 апрельыште Зоя Исинбаевналан 55 ий темын. Тыланда да тендан лишыл еҥда-влаклан чыла сайым гына: пеҥгыде тазалыкым, пиалым, сеҥымашым тыланен кодына.

Келтей КШ-ын коллективше.