Сай айдеме нерген каласынена…

Тиде – Людмила Евгеньевна Якупова. Шке паша корныжым районысо образований пӧлкаште тудо 1995 ийыште питаний шотышто технолог лийын тўҥалын да 2011 ий марте тиде пашате тыршен. Тиде ийынак тудым районысо педагогика информаций рўдерын методистше пашашке кусареныт.

Кеч-могай пашамат тудо куштылгын шукта. Образований пӧлкаште Людмила Евгеньевна ик эн кўлешан да неле функцийым шукта: тудо информаций ресурсым аралыме областьыште политикым рашемда, информацийым аралыме средства-влакын тўз улмыштым терга, районысо образовательный сеть-влаклан консультаций ден технический полышым ончыкта, районысо образований пӧлкан сайтшылан вуйын шога. Икманаш, ик кугыжаныш экзаменат тудын деч посна ок эрте, тыште тудын рольжо эн кўлешан.

Паша деч посна Людмила Евгеньевна сай ава, ака да озавате улеш.

Пашаверыште тудым поро кумылан, кутырен моштымыжлан, полыш кидым шуялташ ямде улмыжлан чыланат пагалат да аклат. Тыгак тудо самырык, шукерте огыл гына пашаш толшо-влаклан полшаш ямде улеш.

Пашам тыршен ыштымыжлан Людмила Евгеньевнам Башкортостан Республикысе Калтаса район муниципаль район администрацийын Чап грамотыж дене палемдыме.

Пагалыме Людмила Евгеньевна! Тендам уло кумылын саламлена. Шке профессийланда ўшанле лийын кодмыланда ме тыланда таум каласена. Пеҥгыде тазалыкым, порылыкым, еш пиалым тыланена.

Районысо образований пӧлкан коллективше.