Могай пўя?

Кодшо арнян соцсетьлаште Павасола пўя нерген рўжге каҥашеныт. Тушто Нефтекамск ола гыч Кугыжаныш Погынын депутатшат, тудын полышкалышыжат да моло общественник-влакат лийыныт манын ойлат.

Молан вара тиде пўялан тыгай кугу тўткышым ойырат – тыгай йодышым ме Калмиямучаш ялсовет администраций вуйлатыше Валерий Маязовлан пуышна.

– Кодший ме пўям эрыкташ тўҥална. Ятыр ий жапыште тыште моткоч шуко йошкын (ил) погынен. Пучым пышташ да пўялен шындаш, вара пашам шуктымо нерген каласаш, конешне, куштылго, но тыгай шонымаш лийынат огыл. Поснак шокшо кеҥеж кечын пўя моткоч чот ўпшен. «Стройтехсервис» деч йошкыным шалатен колташ, экскаваторым йодна. Ялсовет администрацийын шонымашыже сай ыле: пўям тўзатен, чыла эрыктен колташ. Кеч экскаватор южо верыже пуренгаен гынат, икымше кечын пашам сай шуктен. Кокымшо кечын связист-влак пыштыме кабельым йоҥылыш локтылын.

У ий тўҥалтыште связист-влак у кабельым юж дене шупшыныт. Тиде пашам умбакыже мланде кылмыктымеке шуяш шонат.

Павасола ялыште тиде пўя деч посна эше Трудовой урем мучаште пўя уло. Тудо чыла шотыштат сай улеш. Тыгак Чапаев урем тўҥалтыштат пўя уло. Тошто водокачке дене, Калмиямучаш ялыш кайымаштат, начар огыл пўя уло.