Пырысиге-влакым поро кидыш пуэм…

Кодшо курымын 80-ше ийлаште Константин Шангареев нерген район газетыште чўчкыдын возенна. Тунам тудо Ильич лўмеш колхозышто водитель лийын тыршен. Тыглай огыл, ончыл водитель лийын – производствыштат, мер пашаштат. Баян дене пеш мастарын шоктен. Паша деч вара ялысе клубыш вашкен. Тунам клуб вуйлатыше лийын Анатолий Тимиршин тыршен. Клуб пелен гармонист-влакын ансамбльыштым организоватлыме лийын. Икманаш, Изи ден Кугу Агытан яллаште илыш шолын.

Вашке ял дене эксперимент-влакым эртараш тўҥалыныт. Чыла тиде кушко шуктен – чыланат пеш сай палена. Кугу озанлык деч нимат кодын огыл. Тиде жапым илен лекташ Константинланат пеш неле лийын. Тудо вет шочмо коллективыштыже пашам ыштен тунемын, чыла уэш тўҥалаш куштылго лийын огыл.

Колхоз шаланымеке, Константин нефтяник-влак дене водитель лийын ышташ тўҥалын, УТТ-ат ыштен шуктен. Но садыгак шўм-чон шочмо пасулашке шупшын. Шкем кузе гынат лыпландараш манын, мўкшым ончаш тўҥалын. Кызыт тудын 26 мўкш ешыже уло.

Константин дене ме вучыде газет редакцийыште вашлийынна. Тудо лўмын Агытан ял гыч газетышке увертарымашым пуаш толын.

– Мемнан йєратыме пырысна, вич игым шочыктен, – ойла тудо. – Нуным ончаш ик ешлан нелырак лиеш. Сандене газетышке увертарымашым пуаш шонем. Можыч газет пырысиге-влаклан поро оза-влакым муаш полша.

– Молан вара нуным чодырашке от колто, – йодым мый Константин деч.

– Вольык дене тыге ышташ ок лий, – каласыш тудо. – Нуно мемнан гаяк чонан улыт…

Константин дене мутланыме деч вара шўм-чонышто куштылго лиймым шижым. Ял калыкын шўм-чонжо кўэмалтын огыл улмаш. Нимогай реформым, вашталтышым, эксперимент-влакым шотыш налде, нуно поро айдемак лийын кодыныт. Кеч-могай жапыштат шке йолташыштлан, пошкудыштлан полшаш ямде улыт.