Россий туныктышо-влак дене чаплана

Тиде вашлиймашке районысо чыла туныктышо-влак погыненыт ыле. Тыгай каныме тат шагал годым лиеш, сандене сценыште мо лийын, туныктышо-влаклан чыла келшен: нуно пашам пырля ыштыме йолташышт-влак дене вашлийыныт, сай кумыл дене икте-весыштым ылыжтеныт, саламлымашым налыныт, сценыште кажне выступатлышым совым рўж кырен ужатеныт. Конешне, пашам пырля ыштыме йолташышт-влакым награждатлымылан куаненыт.

– Те, мемнан образований системынан кугу поянлыкше улыда, – каласен шке саламмутыштыжо район администраций вуйлатыше Юрий Минзарипович Садыров. – Районысо школлаште шке пашаштым сай палыше мастар-влак гына ыштат. Нунын кокла гыч шукыжо кўкшӧ квалификациян да тўрлӧ олимпиаде ден конкурслаште участвоватлыше да сеҥыше але лауреат лўмым нумалше туныктышо улеш. Юрий Минзарипович туныктышо-влаклан сулен налме наградым кучыктен.

«Отличник народного образования Республики Башкортостан» оҥеш пижыктыме знак дене 2 №-ан Краснохолмский кыдалаш школын директоржо Е.Ф. Нурова ден 2 №-ан Краснохолмский кыдалаш школын тўҥалтыш класслаште туныктышыжо К.А. Садыковам палемдыме. Башкортостан Республикысе образований министерствын Чап грамотыжо дене 2 №-ан Калтаса кыдалаш школын музыкым туныктышыжо Г.П. Байрамовам да Амчемучаш кыдалаш школын тўҥалтыш класслаште туныктышыжо И.М. Исиметовам палемдыме. Республикысе образований министерстве деч тауштымашым 1 №-ан Калтаса кыдалаш школын информационно-коммуникационный технологий шотышто директорын алмаштышыже А.Р. Кагировлан да 3 №-ан Краснохолмский кыдалаш школын туныктышыжо Р.З. Сиразевлан увертарыме.

Эн шокшо да поро мутым пашам пырля ыштыме йолташыже-влаклан районысо образований пӧлкан вуйлатышыже Э.Р. Гарипова каласен. Эльвира Рашитовна умбакыже туныктышо-влакым награждатлен. Марий Эл Республикысе «Союз писателей России» региональный мер организацийын Чап грамотыж дене Амчемучаш кыдалаш школын туныктышыжо И.М. Исиметовам да Актыган тичмаш огыл кыдалаш школын туныктышыжо И.Ш. Минабашевам палемдыме. Республикысе туныктышо-влакын профушемыштын Чап грамотыж дене 1 №-ан Калтаса кыдалаш школын туныктышыжо Н.Е. Тимофеевам, Ӱлыл Качмаш кыдалаш школын туныктышыжо И.П. Сайфуллинам, 1 №-ан Краснохолмский кыдалаш школын туныктышыжо И.А. Ивановам да Келтей кыдалаш школын туныктышыжо Э.К. Калямшинам палемдыме. Образований пєлкан грамотыжо дене «Эн сай кабинет» конкурсышто сеҥыше-влакым палемденыт. Тиде – Киябак тичмаш огыл кыдалаш школын туныктышыжо Ф.А. Султанова, тудо «Лучший кабинет башкирского языка» конкурсышто сеҥен да 1 №-ан Калтаса кыдалаш школын туныктышыжо Л.С. Яныбаева, тудо «Лучший кабинет русского языка» конкурсышто эн ончылно лийын, а “Лучший кабинет марийского языка” конкурсышто Тошто Орьямучаш ООШ-ын туныктышыжо Ю.С. Исликаева сеҥен.

Тиде кечын туныктышо-влакын сеҥымашышт нерген шуко ойлымо. Туге гынат, шўмеш логалше тат, тиде, конешне, туныктышо юбиляр-влакым чапландарымаш.

Пагалыме ветеран, педагогика пашан мастарже-влакым, кєлан тений 75, 80, 85, 90, 95 ий темын, зал нуным вер гыч кынелын, совым рўж кырен саламлен. Тыгак шуко поро мутым 50, 55, 60, 65, 70 ийым темыше юбиляр-влакланат ойленыт.

Школышко пашам ышташ самырык туныктышо-влакат толыт. Конешне, пытартыш ийлаште тыгайже шагалем толеш. Тений районысо педагогика кугу ешышке Логунова Дарья Юрьевна ушнен. Тудо 3 №-ан Краснохолмский кыдалаш школышто тыршаш тўҥалеш. «Шкаланет ўшане, чарнен ит шого, ўшан дене ончыко кае», – каласен самырык туныктышылан 2 №-ан Калтаса кыдалаш школын руш йылме ден литературым туныктышыжо А.М. Новоселова.

Муро, почеламут, куштымаш, сценке – чыла тиде концерт программыште лийын. Тудыжым Кєтерем кыдалаш школ ден йочасадын коллективше ямдыленыт. Кажне выступленийым совым рўж кырен вашлийыныт. Мучаште «Туныктышын вальсше» йоҥген.

Пайрем мероприятий мучашке лишемын, саламлымаш ден совым рўж кырымаш шеҥгелан кодыныт, но илыш ден туныктышын пашаже умакыже шуйнат.