Села ден ял-влакым аллей дене сӧрастареныт

5 октябрьыште «Экологий» нацпроект почеш регионышто «Ужар Башкирий» чумыр республике акций эртен. А тудлан республике ЖКХ министерстве тўҥалтышым пыштен да калык коклаште экологический культурым кўкшемден колташ манын эртаралтеш.

Мемнан районышто илыше калыкат ты акций деч ӧрдыжеш кодын огыл.

Райрўдыштӧ тудо селан рўдӧ площадьыштыже изирак импровизированный митинг гыч тўҥалын. Субботникын участникше-влак – организаций да учреждений-влакын пашаче коллективышт – спорт флэш-мобыш ушненыт, а тудым Ирина Карасева вуйлатен. Паша деч ончыч чогашыл ден йыжыҥым ырыкташ пайдале. Вара селаште илыше калыкым район администраций вуйлатыше Ю.М. Садыров саламлыш. Юрий Минзарипович акцийыш ушнымылан кугу таум каласыш.

– Мемнан селана, ме тыште илена да мыланна тудым тўзатыман, ужартыман, – тыге каласен тудо мучаште.

Погынышо-влакым тыгак муниципаль район Совет вуйлатышын алмаштышыже, район газетын редакторжо В.А. Акиев саламлыш. А райрўдӧ Культура пӧртын солистше-влак Русиева Кристина, Карасева Ирина, Валентина Гиздельханова пашашке пайрем шўлышым пуртеныт.

Митинг деч вара пашаче коллектив-влак ончылгоч палемдыме участкылаште тыршаш кайышт. Кӧ-дыр эрыктен да шке организацийжын территорийыштыже пушеҥге-влакым шынден, а кӧ-дыр райрўдӧ уремыште – Карл Маркс уремым ужартымаште участвоватлен. Тыште кум участкыште кожым, пўнчым да пызле вондерым шынденыт. Кож деч пўнчым «Калтаса шокшо сеть» МУП-ын пашаеҥже-влак кўнчаш спецоборудований полшымо дене конденыт да пушеҥгым шынденыт. Нунак Карл Маркс уремыште АЗС марте корно воктене пўнчым шынденыт.

Яллаште пўнчым, кожым, пызлым, куэм, шопкем да олмапум шынденыт. Изи Качак ялыште ончычсо тўҥалтыш школ территорийыште олмапу-влакым шынденыт да аллейым «Школ нерген шарнымаш» манын лўмденыт. Ындыжым кажне шошым ты шарнымаш верыште коло олмапу пеледаш тўҥалеш. А эше ты ялыштак Советкий уремыште лу олмапум шынденыт.

Амчемучаш ялыште витле вондо слива ден вишням шынденыт да ты аллейым «Тазалык» манын лўмденыт. Кєтеремыште Нефтяникмыт уремыште «Пызле» аллейым шынденыт. Тыште шўдє вондо пызле кушкаш тўҥалеш. Пызлым да эше куэм тыгак Павасола да Васола яллыште шынденыт. Тошто Яш ял калык ойыртемалтын. Нуно канде кожым муыныт да шке Садовый уремыштым сӧрастареныт.

Яллаште аллейым але паркым ыштеныт да нунылан оҥай лўм-влакым пуэденыт. Тӧлдӧ ялыште йоча годсо жап парк, а Тошто Оръямучаште – тазалык парк. Тӧлдӧ ялсоветын Кугу Тогыний ялыштыже пўнчӧ гыч аллей кушкаш тўҥалеш. Тудлан «Сарышто колышо салтак-влакым шарнымаш» лўмым пуэныт. Тудым ялыште Кугу Ачамланде сарын участникше-влаклан обелиск воктене шындыме.

Воктене улшо территорийым ужартыме шотышто акций тений шошымат эртен. Тунам 160 утла тўжем еҥ участвоватлен, 109 тўжем пушеҥге ден вондерым шындыме лийын. Шыжымсе акций эн кугу лийын. Тидым мемнан районыштат ужаш лийын. Шошым кугу яллаште гына пушеҥгым шынденыт гын, ты гана районысо кажне ялыште субботник эртен.