Все новости
Новости
18 Шыжа 2019, 21:00

Корейла помидорым ыштена

Корейла кешырым чылан кочкын улынна, а вот помидорым…Кучыза рецептшым

Кӱлыт:
– помидор,
– 2 кугу тамле пурыс,
– 1 кочо пурыс,
– 6-7 пӱй чеснок,
– 1 кугу кешыр,
– 1 кугу пане (курык дене) шӧнчал,
– 1 кугу пане (курык дене) шекар,
– 80 мл кушкыл ӱй,
– 70 мл 9 %-ан уксус,
– укроп, петрушко.
Тыге ямдылыман: тамле да кочо пурысым чеснок дене пырля мясорубко гоч колтена. Кешырым терко гоч «корейла» семын, олым пырче гайым, ыштен нӱжена. Ужар йӧр шудым тыгыдемдена.
Ынде чыла тидым ик кугурак атыш пыштена. Тушко шӧнчалым, шекарым, кушкыл ӱйым ешарена да лугена. Пытартышлан уксусым темена, эше ик гана сайын варена. Тиде заливке манмым ик жаплан кораҥден шындена.
Ты жапыште мӧҥгыштыда могай помидор уло але кодын, тугайым: ужаргым, йошкаргым але пеле кӱшым – налына, мушкына, пелыгыч але ныл ужашлан пӱчкедена. Ынде тудым стерилизоватлыме банкылашке заливке дене пырля лончын-лончын оптена.
Банке-влак ӱмбаке кӱртньӧ петыртышым пыштена да каструльыш пастеризоватлаш шындена. Вӱдын шолаш пурымекше, ик литран банкым 15 минут кучена, луктына, петыртыш дене петырена. Пундашыж дене кӱшкӧ савырена, иктаж-мо дене пӱтыралына да йӱкшаш кодена.