Рӱдӧ район библиотекын лудмо залыштыже экологий шот дене "йыргешке ӱстелым" погеныт

Экологий – кызытсе жапын ик эн кугу проблемыже. Пытартыш лу ий жапыште тудо моткоч пӱсӧ лийын кодеш.

Мемнан районысо шуко библиотекын пашаштыже ик направлений – кушкын толшо тукымым экологий теме дене палдараш, тудын дене кылдалтше мероприятий-влакым эртарымаш.

Рӱдӧ район библиотекын лудмо залыштыже йыргешке ӱстелым погеныт. Тышке «Калтаса чодыра» АУ вуйлатышын алмаштышыже З.Х. Сафиным да 1 №-ан Калтаса кыдалаш школын 8-ше классыште тунемшыже-влакым каласеныт. Зильфир Канифович йоча-шамычлан шке пашаже, чодыраште тӱрлӧ ситуацийыште шкем кузе кучаш кӱлмӧ нерген каласкален.

Мероприятий эртыме жапыште библиотекарь-влак правовой йодыш-влакым умылтареныт, экологий дене кылдалтше дате ден пайрем-влак нерген каласкаленыт. Нуно биологий да зоологий дене викториныште участвоватленыт да нине предмет-влакым сай палымыштым ончыктеныт.

Мероприятийлан выставке-влакым: «Под пологом леса» ден «Наш дом – земля» – ямдыленыт. Тыште экологий дене научный да учебный литературым, периодический изданий да сылнымут литературым ужаш лийын.

Мемнан тӱня – мемнан кидыште, мемнан дечын тудын пӱрымашыже шога. Сандене тудым йӧраташ да аралаш кӱлеш.

И. Васиева.