Калтаса ужара
+20 °С
Пылан
Все новости
Новости
24 Шыжа 2019, 21:40

Киябак почто пӧлкан коллективше изи гынат, нуно кугу пашам шуктат

Киябак почто пӧлкан коллективше изи гынат, нуно кугу пашам шуктат

Почто пӧлка Шоръялысе клубын ик служебный пӧлемыштыже верланен. Тиде почто пӧлка ныл ялым – Киябак, Шоръял, Павасола, Васола – обслуживатла.
Коллектив кугу огыл, тыште кум ӱдырамаш гына тырша. Нуно моткоч кӱлешан, социально-значимый пашам шуктат: калык коклаште районысо, республикысе, регионысо да рӱдӧ прессым шаркалат. Нуно кӱлешан кугыжаныш функцийым шуктат, икманаш, калык ден власть коклаште шке семын кӱвар улыт… Тышеч мый пагалыме ӱдырамаш-влак дене мутланаш тӱҥальым.
– Тидыже тыге, конешне, – мый денем кӧнат нуно. – Но молан дыр кугыжаныш мемнам ок жапле. Почтальон чотым иземденыт, арняште кум кече веле пашам ыштена, сандене пашадарат кум тӱжем теҥге веле. Кӧлан дыр тудо полша. Тольык мыланна огыл…
Туге гынат, чыла тидым шотыш налде, нуно йӱр ма, лум – газет ден журналым калык деке намиен шукташ тыршат. Газет ден журналым гына огыл, тыгак нуно тӱрлӧ сатум ужалат. Кызыт ялысе кажне почто пӧлкалан кӱшычын тӱрлӧ сатум ужалашлан планым колтат: бытовой технике, ӱдырамаш аксессуар да шуко молат. Ик тылзе жапыште, мутлан, Киябак почто пӧлка 20 тӱжем теҥгылан тӱрлӧ сатум ужалышаш улеш.
Тиде изи коллективым Кудаева Олеся Радиславовна вуйлата. Специальностьшо дене тудо туныктышо улеш. Кок дипломжо уло. Туге гынат, тудо школышто огыл, а почтышто ышта. Тыште титакан – оптимизаций. Оптимизаций мемнан декат, журналист ден корреспондент-влак декат толын шуын. Редакцийлаште материалым возышо 2-3 пашаеҥым гына кодымо. А печать линий дене чиновник-влак, мӧҥгешла, кок-кум гана шукемыныт.
Олеся Кудаеван почто отрасльыште тыршыме паша стажат изи огыл. Тыште пашам ыштыме жапыште тудо кум икшывым шочыктен.
– Нылымшымат ыштен кертам ыле, – мыскара йӧре каласыш тудо. – Чӱчкыдын декретыште шинчет, кунам пашам ышташ тӱҥалат манын вуйлатыше каласыш.
Кажне мыскараште чынжат уло. Вуйлатышылан эн тӱҥжӧ – тудын пашаеҥже чарныде пашам ыштыже, а эллан икшыве-шамыч кӱлеш – огешат шоналте, докан.
Почтальонка Иванова Жанна Шоръял ден Киябак яллаште газет ден журнал-влакым шалата.
– Шоръял кугу ял, – ойла Жанна. – Шым урем, тушеч кумытшо дене гына эрташ лиеш, моло уремлаште кугу кемым чийыде ошкылаш ок лий. Йӧра кеч Киябакыште чыла уремлаште асфальт. Южгунам шала коштшо пий-влак кержалтыт.
Павасола ден Васола яллам почтальон Марина Богданова обслуживатла. ™дырамаш-влак чыланат тыршышан улыт.
Поснак почтальон-влак Всероссийский подписке декаде жапыште тыршеныт. Район газетлан гына 50 еҥ сералтын.
…Почта пӧлка шке омсажым почеш веле, тышке икте почеш весе толаш тӱҥалыт. Кӧ дыр газлан, электроэнергийлан тӱла. Но эн тӱҥжӧ – эрдене эрак тыште ялысе чыла уверым пален налаш лиеш: кӧн дыр ушкалже презылен, кӧн дыр пелашыже черетан вахте гыч мӧҥгӧ пӧртылын да пеленже мыняр оксам конден, кӧ дыр сӱанлан ямдылалтеш. Сандене эре почтышко вашкыза! Но тыгодым мемнан газетлан сералташ ида мондо.