Уфа оласе «Родина» кинотеатрыште «Прикосновение» инвалид-влак коклаште актер мастарлык театр сезон» творческий конкурс-фестиваль почылтын

Октябрь тылзын икымше пелыштыже Уфа оласе «Родина» кинотеатрыште «Прикосновение» инвалид-влак коклаште актер мастарлык театр сезон» творческий конкурс-фестиваль почылтын.

Мероприятий кум кече эртен да инвалид-творческий еҥ ден профессионал актер-влакым иктыш ушен.

Фестиваль Уфа оласе «Мир» инвалид-влак организаций, «Преград НЕТ» инвалид еҥ-влак нерген региональ интернет-проект да Уфа оласе кугыжаныш академический руш драмтеатрын пырля ыштыме проектше. Тудым кугыжаныш академический руш драмтеатрын художественный вуйлатышыже, РФ ден БР-ын искусствын сулло пашаеҥже Михаил Рабинович почын. Лач тудо фестивальым ты театрыште эртараш темлен да пайрем куаным кондыжо манын ямдылалтме пашаште кугу полышым ончыктен.

Фестивальыш республикын тӱрлӧ ола ден районлаж гыч 160 утла участник толын. Конкурсышто участвоватлаш 21 команде йодмашым пуэн. Нунын коклаште Калтаса район гыч «Эх-ма, Калтаса» команде (вуйлатыше Эльвира Галимова) лийын. Краснохолмский села гыч Аделия Халиуллина, Кӧтерем села гыч Ирина Мазитова, Калмаш ял гыч Вадим Байдимиров да Калтаса села гыч Вячеслав Шуматов, Айгуль Абдюкова Калтаса районысо инвалид-влак организацийым, а тудым Роберт Иванов вуйлата, ончыктеныт.

Эрлашыжым, фестивальым почмо деч вара, Кугыжаныш академический руш драмтеатрыште, команде-влакын профессионал артист-шамыч дене репетиций-влак эртеныт. Нуно участник-влак дене шке шинчымашышт дене пайлалтыныт, тыгак инвалид-влакым кугу сценыш лекташ ямдыленыт. Калтаса районын кураторжо руш драмтеатрын актержо Иван Овчинников лийын. Лач тудо мемнан артистна-влакым творческий пашалан таратен. Конкурс-фестивальын кумшо кечыжын инвалид-актер-влак шке актерский мастарлыкыштым ончыктеныт. Мемнан районнан сборный командыже «Свадьба в Малиновке» кинофильм гыч ужашым ончыктен.

– Район администрацийын полшымыж дене «Эх-ма, Калтаса» команде сай выступатлен, – шке шонымашыжым ойла Эльвира Гавриловна. – Тиде состав икымше гана сценыш лектын. Мыйын шонымаште, кугу театрын сценыштыже выступатлаш – тиде кугу пиал. Тыште поснак ойыртемалтше еҥ-влакланат кумылло лийын. Эше тидым палемдаш кӱлеш, тыглай еҥ-влак дене залыште ончен шинчен огытыл, а кугу сценыште модыныт. Тиде пиал огыл мо? Икманаш, фестиваль моткоч сай эртен.

«Прикосновение» инвалид-влак коклаште актер мастарлык театр сезон» творческий конкурс-фестиваль республикыште икымше гана эртен. Тудо ий еда эртаралташ тӱҥалеш да поро йӱлашке пура манын ӱшаныме шуэш. Тидын дене Башкортостаныште инвалид-влакын спорт веле огыл, тыгак театральный искусстват вияҥаш тӱҥалеш.