Калтаса районысо школлаште «Взлетай» образовательный проект пелен этношуматкече эртен

Кодшо шуматкечын Калтаса районысо школлаште «Взлетай» образовательный проект пелен этношуматкече эртен.

Мероприятийын цельже – самырык еҥ-влаклан Башкортостан Республикыште да Российыште илыше калыкын чон поянлыкшым аклаш туныкташ, мемнан элысе историй ден культурым тунемаш интересым шочыкташ.

3 №-ан Краснохолмский кыдалаш школат тиде проект деч ӧрдыжеш кодын огыл, тиде кечын тыште икымше этнофестиваль эртен.

– Тиде моткоч сылне пайрем лийын, – каласкала мыланна кок икшыван ава, Крлабаева Евгения, тудын йочашт-влак тыште тунемыт. – Тиде кечын школышто чыла культура иктыш ушнымым ужаш лийын. Тунемше-влак туныктышышт да ача-авашт дене пырля руш, татар, марий, ӱдмурт да моло калыкынат культурыжым, илыш-йӱлажым ончыктеныт. Нуно калык оралте-влакым ядыленыт. Кажыныштыже шке калыкше мо дене поян – ончыктеныт. Конешне, муро да куштымаш деч посна лийын огыл. Йоча-шамыч тӱрлӧ йылме дене почеламутым каласкаленыт, мурым муреныт.

Фестиваль, чынжымак, моткоч сылне лийын. Тунемше-влак шке калыкыштын культурыштым уло кумылын ончыктен. Мероприятийыште лийше чыла калыклан пайрем келшен.