Калтаса селаште "Призывник кечыже" эртен

“Призывникын кечыже” – ончыкылык салтак-влаклан мондаш лийдыме пайрем

Кажне шыжым да шошым Российыште йӱлашкак пурышо призыв кампаний эрта. Мемнан районысо призывник-влак лӱмеш, кӧ тений шыжым Россий Вооруженный Вийын радамышкыже кая, Калтаса селаште пайрем мероприятийым ямдыленыт да эртареныт.

Тиде кечын ончыкылык салтак-влак пайремын организаторжо-влак дене пырля Сеҥымаш паркыш миеныт да Чап мемориал деке венокым пыштеныт, кочашт ден кугезе кочаштым ик жап шып шоген шарналтеныт. Тихоокеанский флотын отставкысе старший лейтенантше, совет офицер-влакын районысо ушемжын вуйлатышыже Флюр Зиннурович Билаловын сугынь мутшо деч вара рвезе-влак районысо историй да краеведений музейыште лийыныт. Тыште нуно Кугу Отечественный сар жапысе экспонат да материал-влак дене палыме лийыныт. Музей директор Роберт Шарафович Шакиртов Кугу Сеҥымашке Калтаса район могай надырым пыштымыж нерген каласкален. Вара призывник-влак шке вийыштым лӱйкалымаште тергеныт, перекладиныште нӧлталалтыныт. Чыла тидым 2 №-ан Калтаса кыдалаш школышто эртареныт. Районысо физический культура да спорт комитет вуйлатыше Кугубаев Вячеслав Имасевичын мутшо почеш, чыла рвезе армийлан физический ямде улеш. Перекладиныште нӧлталалт кертдыме рвезе-шамычым туд чонжо коржын палемден. А тыгайже икте веле огыл умаш. Но тиде радамыштат ончылно улшо-влак ятырак лийын. Нӧлталалтмаште Тогыний ял гыч Диязов Вадим ойыртемалтын. Тудо икымше лийын. Аксямов Игорь – кокымшо. Чашка ял гыч Исинбаев Дмитрий да Калтаса села гыч Булатов Марсель икнаре нӧлталалтыныт да кумшо верым сеҥен налыныт. Лӱйкалымаште эн сай результатым Краснохолмский села гыч Казакбаев Кирилл ончыктен, Калтаса села гыч Тимиргалиев Алексей кокымшо лийын, кумшо – Павасола гыч Ахмадиев Джордж. Сеҥыше-влакым диплом-влак дене палемденыт.

Умбакыже Призывникын кечыже районысо Культура пӧртышкӧ куснен, тыште нуным адакат сугынь мут-влак вученыт.

– Вашке те мемнан кугу элнан – Российын Вооруженный Вийжын радамышкыже логалыда, – тыгай шомак дене тӱҥалын шке сугынь мутшым район администраций вуйлатыше Юрий Минзарипович Садыров. – Тудын лӱмжӧ – Шочмо элым аралаш. Тиде кече лач тыланда лӱмдалтын, вет те шкендан Конституций порысдам шукташ ямде улыда.

Тудо призывник-влак деч мемнан Калтаса районым сай велым гына ончыкташ йодо.

Тыгак призывник-влак лӱмеш шуко поро мутым Янаул ола, Янаул ден Калтаса район-влакын военный комиссарже М.К. Харисов, районысо ветеран-влак ушемын вуйлатышыже Е.И. Ильчигулов, Калтаса районысо мусульман-влакын имам-мухтасибышт Ибрахим хаджи хазрат Абзалетдин, афган сарысе ветеран-влакын районысо ушемжын вуйлатышыже М.И. Сидоров ойленыт.

Нуно чыланат кугезе коча-влакын подвигышт нерген шарнаш, армийыште сай служитлаш да мӧҥгӧ виян да таза пӧртылаш шӱденыт. Военный комиссар Марат Кавыевич Харисов палемден, тек тиде ий рвезе-шамычлан арам ок йом, а иктаж-мо у дене пойдаралтеш. Район администраций вуйлатыше дене нуно ончыкылык салтак-влаклан шарнен илаш пӧлекым кучыктеныт. А Культура пӧртын артистше-влак нунылан муро ден куштымаш-влакым пӧлекленыт.